Сыйластық қимастыққа ұласты...
Қызылорда облысы бойынша меншікті тілші
Қазалы вагон пайдалану депосы – ғасырлық тарихы бар ежелгі кәсіпорын. Теміржолшылардың қарашаңырағына айналған мекемеде осы жылдар ішінде неше мың адам еңбек етіп, нәпақасын айырды.
Күні кеше депо ұжымы екі бірдей майталман теміржолшыны құрметті демалысқа шығарып салды. Мамандық таңдауда жаңылмаған қос зейнеткер әріптестерінің ықылас-құрметіне риза болып, туған шаңырақтарына айналған депода өткен жылдарын қимастықпен еске алатындарын жеткізді. Зейнеткерлерді ұжым басшылығы мен кәсіподақ ұйымы құттықтап, оқалы шапан жауып, естелік сыйлықтар табыс етті.
– Асылбек Молқаждарұлы мен Сақыпжан Аяғановтың екеуі де тәжірибелі вагон қараушылар. 41 жылдық жұмыс өтілінің 24 жылын осы кәсіпке арнаған Асылбек еңбек жолын жылжымалы құрамды жөндеу слесары болып бастап, бүгінде аға вагон қараушы-жөндеуші болды. Сақыпжан Аяғанов 45 жылдық жұмыс тәжірибесінің алғашқы бөлігінде жол монтері, станция кезекшісі болып, 1998 жылдан бері біздің депода аға вагон қараушы-жөндеуші болып зейнетке шығып отыр, – деді деподағы кәсіподақ ұйымының төрағасы Бақытжан Ибрайым.
Зейнет жасына жеткенше асығатын теміржолшылар шығарып салу рәсімінде сыйластықтың қимастыққа ұласқанын сезініп, тіпті көздеріне жас алатыны жасырын емес. Депо басшылығы жастарға тәлімгер ретінде қос зейнеткермен алдағы уақытта да байланыстың үзілмейтінін жеткізді.