«Нұрлы жол» вокзалы мүгедектігі бар жандар үшін қолайлы бола түспек
«Қазақстан теміржолшысы» газетінің тілшісі
Елордадағы «Нұрлы жол» вокзалында мүгедектігі бар адамдарға вокзал кешенінде қауіпсіз жүріп тұруды қамтамасыз ету тақырыбында дөңгелек үстел өткізілді.
Вокзал кешені директорының өндіріс жөніндегі орынбасары Айгүл Өксікбаева төрағалық еткен жиында теміржолшылар вокзал ғимаратында есту, көру қабілеті нашар, тірек-қимыл аппараты зақымданған, көмекші құралдардың немесе басқа адамдардың көмегімен қозғалатын мүгедек жандарға қызмет көрсету сапасын жақсарту мәселесі сөз болды.
Айгүл Өксікбаеваның айтуынша, бүгінде вокзалда 31 дана мүгедектер арбасы, 16 дана тактилді дыбыстық мнемосұлба, 24 пиктограмма, 104 Брайль кестесі, құлағы дұрыс істімейтіндерге арналған 5 индукциялық панель, арнайылап қайта жасақталған 1 билет кассасы, қайта жабдықталған 12 санитарлық торап, вагонға тиеп, түсіруге арналған көтерілмелі 2 механизм, мүгедектерге арналған 2 бөлме, 7 дана шұғыл көмек шақыруға арналған стойка, мүгедектерге арналған 24 автотұрақ, 14 шақыру батырмасы бар. Сонымен қатар тактилді плиткалар кешеннің барлық жеріне қойылған.
Бұл жиынға теміржол қызметкерлерімен қатар мүмкіндігі шектеулі жандарды біріктіретін 4 қоғамдық ұйым мен Астана қаласы Алматы ауданы әкімдігінің өкілдері қатысты. Олар өздері сияқты жандардың қауіпсіздігі мен жайлылығы үшін вокзалда тағы қандай жұмыстар атқарылуы керектігін айтып, ұсыныстарын ортаға салды. Мәселен, «Актив life» мүгедектер қоғамының басшысы Арнур Ысқақов мүгедектігі бар жандар үшін паркингті тегін пайдалану мәселесін шешу, мүгедектер арбасын дұрыс пайдалану мен вокзал қызметкерлерін ситуациялық көмек беруге үйретуге байланысты ұсыныстарын берді. Ал «Қазақ зағиптар қоғамы» ҚБ есеп бойынша технигі, ІІ топтағы мүгедек С. Есілбаев стандарттарға сай әйнек есіктерде сары-қара түспен белгілер қойылуы керектігін жеткізді.
Отырыс нәтижесінде басқа да ұсыныстар айтылды. Атап айтқанда, Диспетчерлік қызметті диспетчерлік құрылғылар орнату арқылы ұйымдастыру, жолаушылармен тікелей жұмыс істейтін вокзал қызметкерлерін, яғни кезекшілерді сурдоаударма машықтарына үйрету, пойыздар кестесі жазылған таблода пойыз вагондарының нөмірлері жазылған ақпараттар беру, құлағы нашар еститін жолаушылар үшін дикторларға хабарлата отырып, визуалды түрде жолаушыларды отырғызып, шығарудың басталғаны туралы хабардар ету, мүгедек жандардың қолайлылығын барынша қамтамасыз ету үшін онлайн билет сатқанда мүгедектерге арналған арнайы орындар бөлу мүмкіндігін қарастыру және тағы да басқа мәселелерді көтерді. Бұл ұсыныстар отырыс хаттамасына толтырылып, вокзал шаруашылығы департаменті бекіткен соң, ұсыныстар тағы қаралып, бюджетке енгізіледі.