Кәсіподақ өкілдері теміржолшылармен кездесу өткізуде

Теміржолшы мен жұмыс берушінің арасында жасалған Ұжымдық келісім шартта көрсетілген баптардың орындалу деңгейіне көз жеткізу, одан бөлек теміржолшылардың талап-тілектерін тыңдап, күрмеулі мәселелер болса, оның себеп-салдарын анықтап, тиісті органдар арқылы жергілікті жерде шешуге ықпал ету үшін кәсіподақ өкілдері ел аралап жүр.

Құрамында «Қазкөліккәсіп» ҚБ төрағасының орынбасары Жұпарбек Сәбитов, ҚБ орталық кеңесінің Экономикалық сұрақтар жөніндегі бас эксперті Алмагүл Еримова, заңгер Назира Кошкумбаева, бас техникалық инспектор Қайрат Мұқанов пен «Медикер» медициналық орталығының өкілі бар топ Сыр өңіріне келді. Аймаққа табан тіреген бойы алғашқы жұмысты бөлімшенің солтүстігіндегі Сексеуіл, Қазалы станцияларындағы еңбек ұжымдарымен кездесуден бастаған кәсіподақ өкілдері Сексеуіл-Қоскөл жаңа теліміндегі Қарашеген станциясына дейін барып, жергілікті теміржолшылардың ахуалын көздерімен көріп қайтты. Жұмысшы топ әсіресе теміржолшылардың әлеуметтік тұрмыс жағдайы, еңбек қорғау талаптарының сақталуы сынды мәселелерге назар аударды. Мысалы, кейбір станциялар мен бекеттердегі модульді тұрғын үйлердің жай-күйіне қатысты сын айтылды. Сексеуіл станциясында өткен алғашқы жиынға жергілікті теміржолшылар көп жиналды.  

– Мен Қызылорда өңіріне үшінші мәрте келіп отырмын. Ең алғаш келген кезіммен салыстырғанда теміржолшылардың жағдайы көш ілгерілеген деп айта алам. Дегенмен, сын тезіне ілігіп, жедел қолға алатын мәселе болмай қалмады. Жұмысшы халыққа керегі, ең алдымен жалақысы отбасын асырауға жетіп, әлеуметтік тұрғыда қорғалса дейді. Біздің де көздеген мақсатымыз осы, елдегі халықтың тиісті көмекті алып, жұмыс орындары жайлы, жылы болып, барлық қажеттілікпен қамтамасыз етілгеніне көз жеткізу. Сондай-ақ, заңдық-құқықтық және әлеуметтік мәселелерге қатысты жұмысшы топ құрамындағы мамандар халыққа жан-жақты кеңес берді, – деді «Қазкөліккәсіп» ҚБ төрағасының орынбасары Жұпарбек Сәбитов.  

Ұжымдық шартта көрсетілген баптардың іске асырылуын көзбен көріп, көңілге тоқып, аймақтағы бекеттерді аралап шыққан жұмыс тобының негізгі мақсаты кем-кетікті сынау емес, көмек қолын созып көмектесу, кеңес беру, түсіндіру, қордаланған жағдай болса, оңтайлы шешілуіне атсалысу екенін жеткізген Жұпарбек Абзалбекұлы алдағы наурыз айынан бастап еңбекақы тағы өсетінін, мерекелерге байланысты сыйақы берілетінін айтып, теміржолшыларды қуантты.  

Жұмыс тобымен кездесу барысында теміржолшылар тарапынан медициналық қызметке байланысты сын көп айтылғандықтан жұмыс тобының Қызылорда станциясында өткен кезекті кездесуіне Медикер компаниясының жергілікті өкілдігінен дәрігерлер жиынға арнайы шақырылды. Медикердің «Өндіріс» медициналық орталығы директоры Сұлтанбек Кенжебаев, орталықтың дәрігерлері Ғалия Нұрмақова, Әсемгүл Махамбетова мен еңбек қорғау инспекторлары көпшіліктің түрлі сауалына жауап берді.