Дұрыс таңдау жасау маңызды
Абай облысы бойынша меншікті тілші
Семей ЖТ бөлімшесінің бастығы Владимир Бабиченко жергілікті сала қызметкерлерімен кезекті жиын өткізді. Басқосуда теміржолшылар қауымының саяси белсенділігі, қоғам игілігі үшін атқарылып жатқан жұмыстар кеңінен сөз болды.
Қазіргі таңда аймақ бойынша 12 мыңның үстінде теміржолшы бар екен. Демек бұл алдағы келе жатқан сайлау науқаны үшін үлкен күш деген сөз. Осы орайда барша сала қызметкерлеріне Жаңа Қазақстан үшін бір кісідей дауыс беріп, дұрыс таңдау жасаудың маңыздылығы зор. Осы бағытта сөз өрбіткен Владимир Владимирович барша әріптестерін қоғамдағы саяси оқиғаларға немқұрайлылық танытпауға шақырды.
Жалпы, бұл жолғы саяси науқанға даярлық жаңадан құрылған Абай облысы үшін қызу түрде өтуде. Облыстық және аудандық, қалалық мәслихаттарға үміткер ретінде тіркелген теміржолшылар қауымының қатары өте көп. Басым көпшілігі – станция басшылары. Сонымен қатар сайлауалды шараларға атсалысушы теміржолшылар да аз емес. Осының өзі жаңа облыс үшін саяси науқанның мейлінше тартысты өтіп жатқанын айғақтайды.