Еңбек қорғау күні: Жарақат алған жұмысшылар ескерусіз қалмады

Дүниежүзілік еңбек қорғау күніне орай Астана жол дистанциясында кәсіподақ комитетінің ұйымдастыруымен өткен іс-шарада «Қазкөліккәсіп» ҚБ Астана торабы бойынша филиалының төрағасы Серік Сәрсекеев өндірістік жарақат алғандар мен еңбек қорғау бойынша қоғамдық инспекторларды арнайы марапаттады.  

Жиын өндірісте жүріп қайтыс болғандарды 1 минуттық үнсіздікпен еске алудан басталды. Еңбек қорғау жөніндегі қоғамдық инспекторлар Бақытжан Тәженов пен Ерлан Смыков «Еңбек қорғау жөніндегі үздік техникалық инспектор» дипломы және соған қоса ақшалай сыйлықпен марапатталды. Сонымен қатар өндірісте жарақат алған дистанцияның 5 қызметкері – жол бригадирі Нұржан Әбішев, өндірістік-техникалық бөлім маманы Дина Төлегенқызы, өткел кезекшісі Еркін Елемесов, дрезина машинисі Олег Поспелов, еңбек қорғау бойынша қоғамдық инспектор Мұхамед Қаженовке азық-түлік пакеті берілді. Одан бөлек еңбек жағдайын жасау мақсатында №7 телімге шәйнек пен пеш табыс етілді. Сондай-ақ дистанцияның өндірістік телім бастығы Ернұр Смағұлға және техник-жолшы Жаңылсын  Матеноваға өндірістегі еңбек қауіпсіздігі мен еңбек қорғауды қамтамасыз етуге қосқан үлесі, кәсіби біліктілігі мен өз міндеттерін сапалы әрі жауапты атқарғаны үшін Алғыс хат табысталды.  

– Еңбек қорғау күні бүгінде әлемнің жүзден астам елінде атап өтіледі. Соның ішінде Қазақстан да бар. Шығу тарихына келсек, 1989 жылы Канада мен Американың жұмыскерлері өндірісте жазатайым оқиғалардан зардап шеккен адамдарды еске алу үшін 28 сәуір күнін арнайы бекітуді ұсынды. 1996 жылы халықаралық еңбек ұйымы осы күнді Дүниежүзілік еңбек қорғау күні деп белгілеуді қолдады. Бірақ ол әлемдік деңгейде аталып өту үшін де біраз уақыт өту керек болды. Бүгін, міне, біз нағыз өндірістің ортасында жүретін сала мамандары – жолшыларды марапаттауға келіп отырмыз, жол шаруашылығы бойынша еңбек қорғауға зор үлес қосып жүрген теміржолшылар көп, – деді С.Сәрсекеев.  

Дистанция кәсіподағының төрағасы Біржан Алмежановтың айтуынша, мекемеде еңбек жағдайын жасау үшін көптеген жұмыстар жасалуда. Соның бірі – биыл дистанция әкімшілігінің күрделі жөндеуден өткізіліп, заманауи жабдықталған 3 қабатты ғимаратқа көшуі. Жаңа ғимараттың іші-сыртын, төбесін толық жөндеу жұмыстарына ҚТЖ-дан қаржы бөлініп, ішкі жиһаздары мен басқа да керек-жарақтарын алуға дистанция кәсіподағы көмек берген.