Балаларға базарлық
Арыс қаласында 6 маусым күні «ҚТЖ-Жүк тасымалы» Шымкент филиалы мен Шымкент магистральдық желі бөлімшесіне қарасты мекемелер, ПЧ-54 Арыс жол дистанциясы, ШЧ-38 Арыс белгі беру және байланыс дистанциясы, Арыс станциясы, ВЧД-32 Арыс вагон пайдалану депосы кәсіподақ ұйымдарының күш салуымен балаларға арналған мерекелік іс-шара өтті.
Теміржолшылар қаласында өткен мерекелік шараға 1500-ге жуық балақай қатысып, барлық балаға балмұздақ пен тәттілер таратылды. Арыс-1 вокзалы маңындағы «Батырлар аллеясында» балаларға арналған концерттік бағдарлама ұйымдастырылып, ойын алаңшасына батуттар тігілді.
Халық өте тығыз қоныстанған өңірде балалар мерекесін атап өтудің кешірек өтіп жатуының да өзіндік себептері жоқ емес. Біріншіден бала көп, бәрін қаму керек, сонымен қатар ойын алаңшалары мен кинотеатрлар, балаларға арналған көңіл көтеру, сауық-сайран ұйымдастырушы топтарға сұраныс көп болып кезек күтуге тура келді. Дегенмен, ештен кеш жақсы, кәсіподақ аймақтағы әр мекеменің балаларын балмұздақсыз қалдырмауға тырысты.
Балаларға күлкі сыйлаған іс-шараны ашқан аймақ кәсіподақ басшысы Нағима Салықбаеваның лебізін жалғастырған Арыс жол дистанциясы кәсіподақ төрағасы Есенгелді Жұмабеков, Арыс белгі беру және байланыс дистанциясының кәсіподақ төрағасы Жасұлан Жанқараев, Арыс станциясы кәсіподақ төрағасы Телғозы Шорахан, Арыс вагон пайдалану депосы кәсіподақ төрағасы Пайызхан Есалиевтер құттықтап, балаларға сыйлық себеттерін таратты.