Шар станциясында 600-ден аса адам тегін медициналық көмек алды
Абай облысы бойынша меншікті тілші
Тіршілік ырғағы бір сарынды Жарма өңірінің теміржолшылары үшін аптаның екі күні дүбірге толы болды. Аймақтағы Шар станциясына Өскемен өңірін шарлап келе жатқан «Саламатты Қазақстан» пойызы тоқтады.
Ақжолтай пойыз Түрксіб теміржолының түп негізі саналатын Шар станциясына дүйсенбі күні таң алагеуімде келіп тоқтады. Пойызды Шар тұрғындары бабалар дәстүрімен шашу шашып, қошеметпен қарсы алды.
Ал таңертеңгі сағат сегізден бастап келушілердің алғашқы легін пойыз дәрігерлері қабылдап қарай бастады. Бұл күні тек Шар тұрғындары ғана емес, оған іргелес орналасқан Суықбұлақ, Жаңғызтөбе, Қалбатау, Жарма, Қапанбұлақ сынды өзге де жол айрықтарының теміржолшылары келіп жеткен еді.
Әсіресе шалғайдағы станция тұрғындарының қолы жете бермейтін көз дәрігері, маммолог, невропатолог сынды мамандарға кезекке тұрғандар саны мол болды.
Семей ядролық сынақ полигонынан зардап шеккен өңір болғандықтан да осы өңірге екі күнге аялдауды жоспарлаған дәрігерлердің жұмысы қарқынды болды. Жалпы саны 600-ден аса адам тегін медициналық көмек алды. Сонымен қатар жергілікті 130 азамат заңгерлер мен медиаторлардың жәрдеміне сүйенді. Сонымен қатар кент тұрғындарына нағыз мереке ұйымдастыруды мақсат тұтқандар бастамасымен елеулі шараға орай ҚР Президентінің телерадиокомпаниясы демеушілігімен арнайы концерт ұсынылды.
– Медициналық пойыздың келуі жергілікті халық үшін нағыз мерекеге айналды. Тамара Асар мен Маржан Арапбаева Шар кентінің орталық алаңында арнайы концерт қойды. Бұрындары эстрада жұлдыздарының өнерін тамашалау үшін үлкен қалаларға сапар шегуге тура келетін, ал бүгін олардың өздері іздеп келгеніне риза болған жергілікті тұрғындардың аталмыш пойызды ұйымдастырушыларға айтар алғысы зор болды, – дейді Шар станциясының бастығы Бейімбет Бейбітұлы.
Семей ЖТ бөлімшесі басшылығы да Шар станциясына барып, мерекелік шараларға куә болысты. «Саламатты Қазақстан» пойызы қазіргі таңда Абай облысының елді мекендерін аралап жүр. Бүгінгі күндері ол бөлімшеге қарасты Белағаш, Дегелең станцияларында қабылдау жасауда. Тек осыдан кейін ғана көршілес Павлодар облысына жол тартпақ.
