Балалар жазғы демалысты қызықты өткізуде
Абай облысы бойынша меншікті тілші
Ел шығысындағы теміржолшылар балалары үшін де жаз қызығы басталып кетті. Бөлімшенің кәсіподақ ұйымы мен кадр бөлімі мамандарының ұйымдастыруымен жазғы лагерьге жіберу шаралары ұйымдастырылуда.
Атап айтсақ, бөлімшеге қарасты желі бойының әр станциясы, әр жол айрығынан жиналған балақайлардың алғашқы легі үшін биылғы жаз оңтүстікте өтіп жатыр. Барлығы 20 бүлдіршін Семей – Қызылорда жолаушылар пойызы арқылы Жамбыл облысындағы «Тау самалы» балалар легеріне аптаның сәрсенбі күні жеткізіліп, орналастырылды. Еліміз бойынша бірегей демалыс орны саналатын осынау лагерьде олар алдағы 14 күн бойы бой жазып, уақытты мейлінше тиімді өткізетін болады. Бүлдіршіндер арасында Аягөз, Шар станцияларынан келгендер бар. Бөлімшенің Жастар ұйымы төрайымы Арайлым Қосанова бастаған ұйымдастырушылар балалардың амандығы үшін өздері алып барып, алып қайтатын болады. Бұл ретте бүлдіршіндер пойыздағы екі күн уақыттарын да жоспарға сай, ұйымдасқан түрде көңілді өткізуде.
– Бір бұл емес, алдағы уақытта балалар лагерінің екінші кезеңі басталатын болады. Қазіргі уақытта даярлық шаралары жүргізілуде. Аталмыш шаралар бөлімшеміздің басшысы Владимир Бабиченконың тікелей назарында тұр, – дейді бұл орайда НОДГП-5 кәсіподақ төрайымы Данагүл Өтеленова.