Вокзал басындағы сауда-саттық тәртібі қаралды
Шымкент желілік полициясы Түлкібас станциясында кездесу өткізді. Полиция подполковнигі Нұрлан Қошқарбеков бастаған тәртіп сақшылары жергілікті халықпен және вокзал маңындағы сауда-саттықпен айналысатын жеке кәсіпкерлермен қоғамдық тәртіптің сақталуы жайлы сөз қозғады.
Кездесуге Түлкібас станциясы бастығы міндетін атқарушы Сералы Арманбетов, Түлкібас кентінің әкімі Бауыржан Жартыбаев, Түлкібас ауданының кәсіпкерлер палатасының басшысы Асылан Ибадуллаев арнайы шақырылып, қатыстырылды. Теміржол вокзалы қоғамдық орын болғандықтан қай кезде де қатаң бақыланады. Түлкібас станциясының теміржол вокзалы мегаполиске кірер қақпа болғандықтан халық тығыз қоныстанған, соған сай қозғалысы жиі, жергілікті халық арасында кәсіпкерлік дамыған жер.
«Жергілікті халықтың кәсіппен айналысып, саудасын жүргізуіне еш қарсылық жоқ, тек бәрі талапқа сай, заңды болуы қажет. Белгіленбеген орындарда сауда-саттық жасауға болмайтынын және лицензиясыз спирттік ішімдік сатуға қатаң тыйым салынатынын қаперден шығармаған жөн. «Бармақ басты, көз қысты» әрекет мұндай қауіп-қатері мол жерде болмауы керек», – деді полиция басшысы.
Шымкент желілік полиция басқармасының қадағалау аймағына жататын Түлкібас станциясындағы теміржол вокзалында сауда-саттықпен айналысатындар көп. Жиында сауда-саттыққа кәмелетке толмағандарды тарту мәселесі де қаралып, жауапкершілік деңгейі сөз болды. Сондай-ақ Қазақстан Республикасының Әкімшілік құқық бұзушылық туралы Кодексінің 204, 200, 559-баптарының талаптары таныстырылды.
