Балалардың жазғы демалысы қызықты өтуде
Қызылорда облысы бойынша меншікті тілші
Түркістан облысындағы «Машат» сауықтыру лагерінде дем алып жатқан қызылордалық теміржолшылардың балалары әр күндерін қызықты өткізіп жатыр.
Қызылорда магистральдық желі бөлімшесіне қарайтын сала мекемелерінен келген 90 баланың дені көпбалалы отбасынан шыққан. Сонымен қатар пәнаралық, халықаралық олимпиадалардың жеңімпаздарына да лагерьге жолдама алу мүмкіндігі жоғары. Балалардың отбасы, әлеуметтік санаты, оқу үлгерімі, тәртібі секілді критерийлер кәсіподақ ұйымы мен кадр бөлімі мамандары тарапынан жолдама бөлгенде міндетті түрде ескеріледі екен.
– Қай жерде, қай мезгілде болмасын балалардың қауіпсіздігі алғашқы орында. Бүлдіршіндерді пойызбен «Машат» сауықтыру лагеріне аман-есен жеткіздік. Жол бойы балалардың денсаулығы, дұрыс демалып, тамақтануы медбикелер бақылауында болды. Бүгінде олардың демалысы өте көңілді өтіп жатыр, қайтуға асығар емес, көпшілігі қызықты каникул күндерінің ұзара түскенін қалайды, – деді дистанцияның кәсіподақ ұйымының төрағасы Дастан Әбішев.
Айтуынша, алдағы күндері келесі топ еліміздегі басқа балалар лагеріне аттанатын болады.
