Балалар үшін тағылымдық саяхат ұйымдастырылды (Фото)
Қызылорда облысы бойынша меншікті тілші
Балалардың жазғы демалысын көңілді де тиімді өткізу үшін бөлімше басшылығының қолдауымен жергілікті кәсіподақ ұйымдары тарапынан түрлі іс шаралар ұйымдастырылуда.
Қызылорда магистральдық желі бөлімшесі кадр бөлімінің маманы Салтанат Махмутова ұйымдастырушылардың бұл әрекетін ата-аналар да қызу қолдап жатқанын білдірді. Жазғы сауықтыру лагерлерінен бөлек, балалардың түрлі тарихи орындарға саяхаты ұйымдастырылуда. Мысалы, жуырда Қызылорда магистральдық желі бөлімшесі теміржолшыларының балалары облыстық өлкетану мұражайына саяхат жасап, тарихи жәдігерлерді тамашалаған. Ал бөлімшенің Қазалы станциясындағы мекемелерде жұмыс жасайтын теміржолшылардың балаларын кәсіподақ белсенділері аудандық Ғани Мұратбаев мұражайына алып барып, танымдық шара өткізген.
– Аймақ теміржолшылары барлық мүмкіндіктерді пайдаланып балалардың жазғы демалысын әсерлі, пайдалы өткізулері үшін жұмыс жасап жатыр. Балалардың барлық игі нәрселерді көкейге түйіп, зейіндерінде жаттауы үшін бөлімшенің кәсіподақ ұйымының төрайымы Ажар Ерманова ерекше еңбек етіп, теміржолшы ата-аналар мен балалардың алғысына бөленуімізге себепкер болуда, – деді кадр бөлімінің маманы Салтанат Махмутова.
