Мектепке жол: Жамбыл облысында 352 отбасыға мектепке қажетті құралдар табысталды
Тараз қаласы бойынша меншікті тілші
Осы жылы «Мектепке жол» акциясы аясында жамбылдық 352 көп балалы және жалғызбасты теміржолшы аналарға мектепке қажетті кеңсе тауарлары толтырылған сөмке таратылды.
Жамбыл жүк тасымалы бөлімшесі кәсіподақ ұйымының сарапшысы Серік Наурызбаевтың айтуынша, бүгінгі күнге дейін бөлімшеге қарасты мекемелердегі бес баладан жоғары немесе жалғызбасты теміржолшы аналарға 211 рюкзак табысталған. Бұл шаралар кәсіподақ ұйымы тарапынан ұйымдастырылуда.
– Әрине, бір отбасында бес немесе одан да көп бала бар болуы мүмкін. Дегенмен, мектепке қажетті заттармен жинақталған әлеуметтік пакет тек біреу ғана беріледі, – дейді Серік Наурызбаев.
Ал Жамбыл магистральдық желі бөлімшесі қызметкерлеріне 141 пакет таратылған. «Біз негізінен облыс орталығынан шалғай жатқан станциялар мен разъезъдердегі теміржолшылардың отбасын қамтуға тырыстық. Және ол қызметкерлерге біздің мамандар өздері жеткізіп берді», – дейді Жамбыл магистральдық желі бөлімшесінің персоналды басқару бөлімінің басшысы Назгүл Кекежанова.
