Теміржолшылардың балаларын мектепке дайындау акциясы қызу жүріп жатыр
Қызылорда облысы бойынша меншікті тілші
Қызылорда темір жолында еңбек ететін қызметкерлердің балаларын жаңа оқу жылына орай мектепке дайындау акциясы қызу жүріп жатыр. Ұжымдық шартта көрсетілген талаптар негізінде тиісті категориядағы ата-аналарға көмек көрсетілуде.
Күні кеше 355 бүлдіршінге оқуға қажетті құралдармен толтырылған мектеп сөмкесі тапсырылды. Қызылорда ЖТ қосалқы бөлімі бойынша «Баланы мектепке дайындаймыз» акциясымен 1227 балаға 2 АЕК көлемінде қаржылай көмек беріліп, мектеп сөмкесі қоса табыс етілген. Мұның 49-ы жалғызбасты ата-аналар. Бұған дейін сондай-ақ Қызылорда белгі беру және байланыс дистанциясында 23 балаға, Қазалы белгі беру және байланыс дистанциясында 38 балаға, Сексеуіл локомотив пайдалану депосында, Қызылорда электрмен жабдықтау дистанцияларында 18 балаға көмек берілген.
– Жалпы, қос бөлімше бойынша 1582 балаға, 544 ата-анаға әлеуметтік қолдау көрсетіледі. Ал отбасы күніне байланысты 487 теміржолшы жанұясына 4 АЕК көлемінде қаржылай көмек беріледі, – деді Қызылорда ЖТ қосалқы бөлімінің кадр маманы Шамшагүл Алпысбаева.
– Қызылорда магистральдық желі бөлімшесінің жеке шаруашылығы бойынша кәсіподақ ұйымы 22 балаға, жалпы бөлімшенің шағын станцияларында тұратын теміржолшылардың 160 баласына көмек көрсетіліп, вокзал шаруашылығы бойынша Ұжымдық шарттың 32-бабына сәйкес үш және одан көп баласы бар және жалғызбасты 57 ата-ана мен олардың 158 баласына әлеуметтік қолдау жасалып, балалардың мектепке қажетті құрал-жабдықтармен қамтамасыз етілуіне көмек берілді, – деді Қызылорда магистральдық желі бөлімшесі кадр бөлімі маманы Салтанат Махмутова.
Науқандық акция аясында Қызылорда ЖТ қосалқы бөлімі кәсіподақ ұйымының төрағасы Мұхтар Көпірбаев Қызылорда, Белкөл станцияларында тұратын теміржолшылардың 25 баласына оқуға қажетті заттармен толтырылған мектеп сөмкесін жеткізіп, Ұжымдық шарт талаптарына сәйкес бөлім теміржолшыларының отбасындағы 3, 4, 5-сыныптарға баратын балаларға және үш немесе одан да көп баласы бар отбасының әр баласы үшін де қаржылай көмек берілетінін жеткізді.
