Қуантсаң – қуант баланы... (Фото)
Атырау облысы бойынша меншікті тілші
«Мектепке жол» жалпы республикалық қайырымдылық акциясы Атырау жүк тасымалы бөлімшесінде қарқынды жалғасуда. «Қуантсаң – баланы қуант» демекші, жыл сайын дәстүрлi түрде ұйымдастырылатын шара өңірде биыл да өткізілуде.
Акцияның мақсаты – 4 және одан көп балалары бар және отбасыларға жаңа оқу жылына дайындық кезеңінде көмек көрсету және әлеуметтік себептер бойынша балалардың мектепке бармай қалуын болдырмау. Биыл Атырау жүк тасымалы бөлімшесі бойынша 109 жұмысшының отбасына, яғни барлығы 350 оқушыға, ал Атырау магистральдық желі бөлімшесі бойынша 283 отбасы, 899 оқушыға 2 АЕК қаражат бөлінді. Одан бөлек екі бөлімше бойынша 252 балаға сөмкеден бастап барлық мектеп оқу-құралдары табыс етілді. Содан соң кәсіподақ тарапынан да аз қамтылған және көп балалы теміржолшылардың, оның ішінде вагонқұрастырушылар, жүк қабылдап-жөнелтушілер, операторлар мен тауар киссирлері, жолшылар, пойыз диспетчерлері, локомотившілер, т.б. қарапайым жұмысшылардың бірінші сыныпқа баратын балаларына сыйлық жасалды. Балалар ата-анасының жұмыс орнынан беріп жатқан осынау сыйлыққа дән риза болды.
