«Саламатты Қазақстан»: Бір күнде екі жүз адам қаралды
Ақтөбе облысы бойынша меншікті тілші
«Саламатты Қазақстан» медициналық пойызы Ақтөбе өңіріне келді. Жылжымалы құрам өңірдің шалғай ауылдарын аралап жүр.
«Саламатты Қазақстан» пойызының Ақтөбе облысындағы сапары Мәртөк станциясынан басталды. Дәрігерлер мұнда ауыл тұрғындарын екі күн бойы қабылдайды. Ол үшін станцияда барлық жағдай жасалған. Алғашқы қабылдау күні мерекелік шара ретінде ашылып, онда аудан әкімі сөз сөйледі.
«Бұл – ауыл халқына көрсетіліп жатқан мемлекеттік қолдау, үлкен көмек. Жоба «Samruk-Kazyna Trust» әлеуметтік жобаларды дамыту қорының қаржылық қолдауымен және Денсаулық сақтау министрлігінің қатысуымен, «Қазақстан темір жолы» ҰК» АҚ жанындағы «Әлеуметтік жобалар қоры» корпоративтік қорымен бірлесіп жүзеге асырылуда. Аталмыш ведомстволарға алыстағы ел атынан алғыс айтамыз», – деді Мәртөк ауданының әкімі Алмас Салықбаев.
Пойыздың құрамы мамандандырылған вагондармен жабдықталған. Ол ультрадыбыстық кабинет, зертхана, стоматологиялық жабдықтар және тағы басқаларымен қамтылған. Екі жатын вагон, бір мейрамхана және техникалық вагон бар.
Медициналық пойыздың мамандарына ауыл тұрғындары отбасыларымен келіп қаралып жатыр.
– Мамандар тегін медициналық көмек көрсетуде. Хирург, уролог, гинеколог, окулист, стоматолог мамандарға келушілер көп. Сонымен қатар жалпы талдама жасауға да жағдай жасалған, – деді «Саламатты Қазақстан» пойызының бас дәрігері Айнұр Егінбаева.
«Жәрдем» пойызы Мәртөк станциясында бір күнде 200-ден аса ауыл тұрғынын қабылдаған. Бір сәтте 20-дан аса медициналық қызметкер шалғай станциялардың тұрғындарына алғашқы медициналық-санитарлық және консультативті-диагностикалық көмек көрсетті. Қазіргі уақытта «Жәрдем» медициналық пойызы әрі қарай Кемпірсай, Жем, Мұғалжар, Бершүгір, Қотыртас, Қарашоқат станцияларына барады. Медициналық пойыздардың қозғалыс кестесі туралы нақты ақпарат әлеуметтік желі, радио, телевидение арқылы беріліп жатыр.
