Медпойыз Батыс Қазақстан облысында жұмыс істеуде

«Саламатты Қазақстан» медициналық пойызы Батыс Қазақстан облысының (БҚО) тұрғындарын қабылдауда.

Доңғалақты емхана бүгін Семиглавый мар станциясына келді, содан кейін - Таскала (23. 09-25.09), Дерқұл (25.09 - 27.09), Переметная (27.09 - 29.09), Белес (29.09 - 01.10), Жайық (01.10 - 03.10), Алғабас (03.10 - 05.10) және Амангелді (05.10 - 06.10).  

Естеріңізге сала кетейік, жоба аясында шалғайдағы станцияларда тұратын ел тұрғындары негізгі медициналық мамандықтардың білікті мамандарынан (терапевт, стоматолог, офтальмолог, лор-дәрігер, хирург, уролог, маммолог, педиатр және басқалар) тегін тексеруден және емделуден өтеді.

Бұдан басқа, халыққа азаматтардың мемлекеттік әлеуметтік қолдау алу, зейнетақы, жәрдемақы, әлеуметтік төлемдер және атаулы әлеуметтік көмек алу құқықтарын қорғау мәселелері бойынша тегін консультациялар беріледі.

 «Саламатты Қазақстан» медициналық пойызын – әлеуметтік жобасын   «Samruk-Kazyna» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның және Денсаулық сақтау министрлігінің қатысуымен, «Әлеуметтік жобалар қоры» корпоративтік қорымен ынтымақтастықта іске асырады. «Саламатты Қазақстан» әлеуметтік жобасының басты ақпараттық серіктесі ҚР Президентінің ТРК болып табылады.

Өткен аптада 11-17 қыркүйек аралығында «Саламатты Қазақстан»  консультативтік – диагностикалық пойызымен 2317 тұрғын тексеруден өтті, оның ішінде балалар – 386, ересектер -1391.