«Денсаулық» пойызы Хантау станциясына келді
"Қазақстан теміржолшысы" газетінің Жамбыл облысындағы меншікті тілшісі
Мойынқұм ауданын аралап жүрген «Денсаулық» пойызы Хантау станциясына келді. Аудан әкімі Әлихан Балқыбеков бастаған жергілікті халық ақжолтай пойызды салтанатты жағдайда қарсы алды.
Мойынқұм – Жамбыл облысының шалғай жатқан аудандарының бірі. Аудан тұрғындары медициналық көмекпен қамтамасыз етілсе де, бірқатар жоғары консультациялық-диагностикалық қызметтер қолжетімсіз. Облыс орталығына қатынай бергенге – жол алыс. Сондықтан Хантауға келіп тоқтаған «Денсаулық пойызындағы» дәрігерлерге қаралып, кеңес алып қалуға тырысқан мойынқұмдықтардың қатары көп болды.
Еліміздің үздік дәрігерлері мен мамандардан жасақталған пойыз ұсынған медициналық ем-дом түрлерімен, шалғай елді мекен тұрғындарының қолы жете бермейтін аппаратуралар қызметімен танысқан кент тұрғындары кезекке тұрып, екі күн пойыздың алдын босатпады.
Мамандардың айтуынша, егер диагностикалық қызметке жүгінушілер қатары көп болса, УДЗ, рентген, түрлі талдаулар 30-35 минутта, ал жалпы 15-20 минутта дайын болады екен. Бір сөзбен айтқанда, тұрғындар бір күнде тексеруден де өтіп, сырқаты болса, диагнозын анықтап, дәрігерден керек кеңесті алып та үлгереді. Шалғай станцияда тұрғындары үшін бұл таптырмас мүмкіндік.
Бір айта кететіні, шалғай станцияларды түгел қамтитын жылжымалы кешен тек медициналық қызмет көрсетумен шектелмейді. Әлеуметтік пойызда даулы мәселелерді оң шешуге көмектесетін медиаторлар, психологтар және заңгерлер тобы жұмыс жүргізді. Азаматтар көкейдегі проблемаларын айтып, мамандардың кеңесін тыңдап, бағыт-бағдар алды.