Пойыздардың кешігуін «Darmen» қосымшасы арқылы білуге болады
Елімізде пойыздардың кешігуі жайлы хабар тарататын «Darmen» қосымшасы 2021 жылы іске қосылған. Қазір бұл қосымшаны 400 мыңнан астам адам пайдаланып отыр, деп хабарлайды Rail-news.kz.
Алғаш болып бұл қосымшаға Астанадағы «Нұрлы жол» вокзалы қосылған. Қазір ол еліміздің 19 вокзалын қамтып отыр, Петропавл мен Өскемен қалаларынан өзге барлық 1-класты станцияларға қызмет көрсетеді.
Егер пойыздар кешігетін болса осы мобильді қосымшаны жүктеген жолаушылардың телефонына Push-хабарлама жолданады.
«Darmen» мобильді қосымшасының маркетинг бөлімінің үйлестірушісі Азамат Гимрановтың айтуынша, 2023 жылы қосымша арқылы 7152 рет хабарлама жолданған.
«Біздің қосымша бірнеше бағыт бойынша қызмет көрсетеді. Соның бірі пойыздардың кешігуі туралы хабарлама жіберу. Мәселен, 2022 жылы «Darmen» мобильді қосымшасы арқылы 3496 рет хабарлама жіберілсе, 2023 жылы 7152 рет хабарлама жолданған. 2023 жылдың қараша айының соңындағы жағдай бойынша біздің қосымшаны 411 668 адам жүктеп алған», - дейді А. Гимранов.
Пойыздың кешігетіні туралы алдын ала хабарлама жіберу жолаушылар үшін өте тиімді. Соған қарап адамдар уақытын текке өлтірмей, басқа істерін бітіріп алады. Әуежайда ұшақтың кешігуіне байланысты хабар жіберу бұрыннан жолға қойылған. Жолаушылар үнемі «пойыздың кешігетінін өз уақытында хабарлап айтпайсыздар немесе мүлдем хабарлама жібермейсіздер» деп көп шағым айтады. Кейбірі хабар жолдайтын «Darmen» мобильді қосымшасы жайлы біле де бермейді.
Азамат «Darmen» мобильді қосымшасын дамыту жұмыстары үздіксіз жүріп жатқанын айтты.
«Егер қаржыландыру болса пойыз қозғалысын онлайн дисплейден көретіндей етіп, сондай-ақ пойыздарды қадағалау қызметін іске қосуға болады», - дейді ол.
Вокзалдар «Darmen» қосымшасының қызметін қолданғанымен, оны жасаушы компанияға ақы төлемейді. Олар бастапқыда жарнама қағаздарын беріп, соларды вокзал ішіне, кіреберістерге ілуді тапсырған. Бүгінде осы қосымшаны жүктеп алған жолаушылар қай пойыз қанша минутқа кешігетінін алдын ала біліп отырады.
Қосымшаның арнайы бөлімінде «пойыз» немесе «электр пойызы» санатын тауып, содан кейін олардың келуі мен кетуін оңай бақылап отыру жеткілікті. Пойыз кешігіп қалса, бұл туралы жолаушыға хабарланады. Сондай-ақ, азаматтарға ауа райының өзгеруі – тұман, көктайғақ, екпінді жел, қардың жаууы салдарынан көрінудің нашарлауы туралы ескертіледі. Бұл қолданбаны кез келген смартфонға оңай орнатуға болады. Осыдан кейін жолаушылар өздерін жайлы сезінеді, өйткені олар пойыздың қай уақытта және қай бағытта келетінін нақты біле алады.