Мүмкіндігі шектеулі 530 мыңнан астам жолаушы "Жолаушылар тасымалы" АҚ пойыздарымен тасымалданды
2023 жылы бұл көрсеткіш өткен жылмен салыстырғанда 42,6% өсті, , деп хабарлайды Rail-news.kz.
Ерекше қажеттіліктері бар жолаушыларға ыңғайлы болу үшін өткен жылы теміржол билеттерін онлайн сатып алу жеңілдетілді. Жеңілдікті билетті 6 таңбалы әлеуметтік ID кодын ұсынбай-ақ сатып алуға болады. bilet.railways.kz сайтында жол жүру құжатын ресімдеу үшін ЖСН және мүгедектік туралы анықтама нөмірін енгізу қажет.
"Жолаушылар тасымалы" АҚ-да мобильділігі төмен жолаушыларға арналған орындары бар 87 вагон бар. Олар 36 бағыт бойынша жүреді. Мүмкіндігі шектеулі жолаушыларға арналған купеде олардың жайлылығы мен ыңғайлылығы үшін барлық қажетті жағдайлар қамтамасыз етілген.
Мүмкіндігі шектеулі жандар үшін темір жол көлігінде жол жүруге жеңілдіктер қарастырылған:
- әлеуметтік маңызы бар маршруттар бойынша 50%;
- Тальгоның коммерциялық бағыттары бойынша арнайы жасақталған купеге, оның ішінде алып жүрген тұлға үшін де 70% мөлшерінде.