Қызылордалық теміржолшылар жолда тұрып қалған жолаушыларды тамақтандырды
Ауа райының қолайсыздығынан автожол бойында тұрып қалған жүргіншілерге теміржолшылар көмекке келіп, оларды ас-ауқатпен қамтамасыз етті.
Сексеуіл станциясының вагон тізімдеушісі, "ҚТЖ 100 жас есім" жобасының қатысушысы, "ҚТЖ корпоративтік волонтер" аталымының иегері Қазбек Садуақасов, ТЧЭ-36 мекемесінің директоры Асылбек Иаров, оның орынбасары "ҚТЖ 100 жас есім" иегері, волонтер, Amanat партиясының депутаты Еркебұлан Аяғанов, Сексеуілдегі ШЧ-40 мекемесінің қызметкері Нажмадин Мусаев, сондай-ақ вокзал басшысы Оңғар Төлегенов бастаған азаматтар жолда қалғандарға қол ұшын беріп, көмекке келді. Сексеуіл жолшылары машинамен қазан-ошақ жабдықтарын тасуға көмектесті. Олар барлығы 600-дей адамды тамақтандырды. Соның барысында 2 қой сойылып, 3 қазан палау әзірленді.
Сонымен қатар Қазалы вагон пайдалану депосының бастығы, аудандық мәслихат депутаты Арғын Орымбаевтың ұйымдастыруымен Қазалы теміржолшылары бірігіп, жолда тұрып қалған жолаушыларға түскі және кешкі мезгілде ас берді. Станциядағы мекемелердің кәсіподақ ұйымдары, белсенді жастар күнделікті 2 тайқазан астан бөлек, сусын, нан үлестіріп, жолаушылардың алғысына бөленді.
Ас-ауқат тегін таратылып жатқандықтан Қазалы станциясы торабында азық-түлік бағасы жергілікті тиісті органдар тарапынан бақылануда.
