OQ қоғамдық қабылдауы ашылды
«Қазақстан теміржолшысы» газетінің тілшісі
«ҚТЖ» ҰК» АҚ-да Amanat партиясының бастауыш ұйымы мүшелері осы партияның Астана қаласы Есіл аудандық филиалы өкілдерімен кездесті. Жиында партияның OQ қоғамдық қабылдауы ашылды.
Кездесуге қатысқан партияның ҚТЖ бастауыш ұйымының төрағасы, компанияның бас инженері Батыр Котырев қатысушыларды толғандырған әлеуметтік бағыттағы сұрақтарына жауап беріп, олардың ұсыныстарын тыңдады. Партияның Есіл аудандық филиалының атқарушы хатшысы Санира Жүсіпова биыл 5 қаңтардан бастап ұйым бастамасымен «Қарызсыз қоғам» жобасы жүзеге аса бастағанын жеткізді. Қаржылық сауаттылыққа үйрететін жобаның қазіргі таңда еліміз үшін маңызды екенін айтты. Аптасына бес күн 3 сағаттан оқытылатын сабақтар мекемелер қызметкерлері үшін ыңғайлы уақытта өтеді.
Оған қатысқандарға сертификаттар беріледі. Сонымен қатар бизнес ашқысы келетін жастар үшін осы жоба аясында тегін оқыту курстары бар екенін мәлімдеді. Ондай курстарға екінші деңгейлі банктер демеушілік етеді. С.Жүсіпова ҚТЖ бастауыш партия ұйымының кабинеттерін аралап, ішкі жұмыстарымен танысты.
– Теміржолшылардың бастауыш партия ұйымының кабинеттері жоғары деңгейде жасақталған, бүкіл жағдай жасалған. Ардагерлері де белсенді. Сонымен қатар партия қатары жастармен де жаңаруда. «Жастар рухы» жастар қанатының өзіндік орны бар, партияластарыма белсенді қызметі үшін алғысымды білдіремін, – деді ол.
