Қайырымдылық пен мейірімділік эстафетасы бастау алды
Түркістан облысы бойынша меншікті тілші
Ел ішінде жас теміржолшылар легін қалыптастыра отырып, оларды еңбексүйгіштікке баулу, үлкенге құрмет, кішіге ізет көрсету Ұлттық компания арасында кеңінен насихатталатыны белгілі. Осы мақсатта шымкенттік жас теміржолшылар арасында өнегелі іс өріс алды.
Шымкент магистральдық желі бөлімшесі кәсіподақ ұйымының қолдауымен Жастар ісі саясаты бойынша өкілі Назарбай Ыбышев бастаған жас теміржолшылар Түлкібас пен Шымкент аралығында жұмыс істеп жатқан Ағадыр машиналандырылған жол дистанциясы мен Шымкент жол дистанциясының жұмысшыларына ыстық ас түстік ұйымдастырып апарды. Олар қыстың көзі қырауда темір жол телімінің 3 360-шақырымында көрнекті Алаш қайраткері, тұңғыш қазақ инженері Мұхамеджан Тынышбаевтың жобасымен 1915-16 жылдары салынған темір жол туннелінің маңында, Түлкібас ауданының аумағындағы тау етегінде 1 500 метр жолды шұғыл ауыстырып жатқан 200-ге жуық азаматты ыстық ас-ауқатпен қамтамасыз еткен жастар тірлігіне барша риза болды. Сол жерде бір мал құрбандыққа шалынып, Қазақ елінің өсіп-өркендеуі жолында жанын пида еткен Алаш қайраткерлерінің рухына Құран бағышталды. Олар қайырымдылық пен мейірімділік эстафетасын жалғастыруды Баянауыл мен Алматы өңіріндегі әріптестеріне жолдады.
Айта кетейік, бүгінгі таңда Ұлттық компанияның айрықша жобасы – «100 жас есім» санатында 200 маман тіркелген болса, Түркістан өңіріндегі түрлі мекеме, кәсіпорындарда 10 жас теміржолшы әрқилы лауазымдарда еңбек етіп келеді.