Құшақ гүлге толған күн

Көктемнің шуақ шашқан алғашқы мейрамының адамзаттың асыл бөлігі әйелдерге арналуы тегін емес. Әйел – ана. Әйел – жар. Әйел – ару. Сондай-ақ әйел – еңбек адамы. Қазақстан темір жолының өсіп-өркендеуіне сүбелі үлес қосып жатқан қыз-келіншектерді төл мерекесі қарсаңында теміржолшы азаматтар гүл шоқтары мен сыйлық ұсынып, жылы лебіз айтып, қарсы алып жатты.

Бүгінде ұлттық компанияда еңбек ететін теміржолшылардың 22 пайызын әйелдер құрайды. Олардың ішінде 19 пайызы компания Басқармасы мен Директорлар кеңесінің мүшелері болса, 24 пайызы – барлық деңгейдегі басшы қыз-келіншектер. Сонымен қатар теміржолдағы әйелдердің 58 пайызы әкімшілік-басқарушылық қызметтерде болса, өндірісте 20 пайызы ерлермен бірдей ауыр жұмыстарда еңбек етеді. Компания тарапынан теміржолшы әйелдердің еңбегі ешқашан елеусіз қалған емес. «Адал еңбегі үшін», «Кәсібі бойынша үздік», «Қозғалыс қауіпсіздігі үшін», «Үздік маман» сияқты сан алуан марапат иегерлері қаншама... Алайда, теміржолшылар үшін жоғары награда «Құрметті теміржолшы» белгісін бүгінде 35 әйел иеленген. Әйелдердің мүддесі биылғы жылдың басында күшіне енген 2024-2026 жылдарға арналған Ұжымдық шартта да қорғалған.

Міне, нәзік жанды әріптестеріне әрқашан құрмет көрсетіп, сыйлайтын ҚТЖ ер азаматтары биыл да мереке қарсаңында компанияның бас ғимаратында әйелдерге арналған тамаша тарту жасады. Ол теміржолшылардың өз өнерлерін ортаға салып, дайындаған концерттік бағдарламасы еді.  

Мерекелік концерт сұлулық иелері – барша әйелдер қауымы ның болмысын ашатын әсерлі өлеңдер оқумен басталды. Бұл нөмірді теміржолдың танымал басшылары Вадим Копылов, Владимир Бабиченко, Ербол Түсіпов, Марлен Көкірекбаев орындады. Келесі кезекте Данель Темірбек, Сабыржан Сағынбаев, Дәулет Кеңесбек сынды теміржолшылар өздерінің кішкентай қыздарымен ортаға шығып, «Қызым» әнін шырқады. Сонымен қатар Дәурен Бектұрғанов, Асхат Саликов «Шашы ұзын қыз» әнімен жиналған арулардың көңілін көтерді. Қарағандылық машинистер «Мир не прост» әнімен көрермендердің көзайымына айналса, тағы бір теміржолшы Ұзақбай Темірлан «Ана» әнін орындап, жүректі елжіретті. Арман Сұлтанов пен Дәурен Құтпанбаев орындаған «Жаным» әні, Әуезнұр Әліп орындаған «Әр әйел бақытты болуға лайықты» әндері лирикалық иірімдерге толы болды. Ал ағайынды теміржолшылар Ілиясовтардың «Попурриі», «ҚТЖ» ҰК» АҚ аппарат басшысы Серік Кеулімжаев пен «ҚТЖ» ҰК» АҚ басқарма төрағасының орынбасары Әнуар Ахметжанов орындаған «Әйелдер» әні мерекелік көңіл-күйді еселей түсті. Зал толы қыз-келіншектер әріптестерінің өнеріне қошемет көрсетіп, шексіз ризашылық білдірді.