Түркістан станциясы су тасқынынан зардап шеккендерге біркүндік еңбек ақысын аударды
Түркістан станциясының жұмысшылары су тасқынынан зардап шеккен халыққа 1 күндік еңбек ақыларын аударып жәрдем көрсетуге ынталы екенін білдірді, деп хабарлайды Rail-news.kz.
Қиын қыстау кезеңде қолдау көрсеткен барша әріптестерге шексіз алғыс білдіреміз! Еліміз аман, жұртымыз тыныш болсын! Күшіміз бірлікте!
Айта кетсек, болат магистралінің қызметкерлері су тасқынынан зардап шеккен адамдарға көмектесуге өз үлестерін қосуды жалғастыруда. Олар гуманитарлық көмек жинауға, төтенше жағдаймен күресуге қажетті арнайы техниканы жеткізуге қатысады, құтқарушылар мен зардап шеккендерге ыстық тамақ ұйымдастырады, бөгеттерді, өзен жағалауларын нығайтуда.
23 мыңға жуық теміржолшы су тасқыны салдарымен күресуге жұмылдырылды. Қостанайлық теміржолшылар құм салынған қаптардан көпірлерді нығайтты. Атырау теміржолшылары 5 мың қап құм дайындау жұмыстарын жүргізді. Орал станциясының қызметкерлері құтқарушыларға ыстық түскі ас ұйымдастырып, гуманитарлық көмек жинап, бөгетті нығайтуда. Мақат станциясы вокзалының қызметкерлері құтқарушыларға қажетті құрал-жабдықтарды: күректер, қаптар мен қолғаптар берді. Атырау облысының теміржолшылары су басқан аудандардан кетуге мәжбүр болған бірнеше отбасын үйлеріне паналатып отыр. Жас теміржолшылар уақытша орналастыру пункттерінде қажетті көмек көрсетуде.
