Сарыағаш станциясына Тәжікстаннан гуманитарлық жүк жеткізілді
Түркістан облысы бойынша меншікті тілші
Еліміздің батыс өңірі мен бірқатар облыстардағы су тасқынына байланысты бауырлас елдерден гуманитарлық көмектер жеткізіле бастағаны белгілі. Өткен демалыс күндері Сарыағаш станциясы Тәжікстан мемлекетінен келген жүкті қабылдап алды.
Іргелес жатқан бауырлас елден 59 вагонға тиелген гуманитарлық жүк – құрылыс материалдары мен азық-түлік және гигиеналық заттар, кереует пен төсек-орын жабдықтары, т.б. бүгінгі таңда табиғи апаттан зардап шеккен өңір халқына қажетті дүниелер екен.
Сарыағаш станциясында жүк тиелген вагондарды қабылдау шарасына жергілікті жердің атқарушы билік өкілдері мен Шымкент жол бөлімшесінің бастығы Нұрдәулет Байғазиев бастаған сарыағаштық теміржолшылар және Қазақстан мен Тәжікстан республикасының ресми өкілдері қатысты.
– Ел басына күн туып, ер азамат етікпен су кешкен кезеңде көмек беріп, қол ұшын созған тәжік бауырларға зор алғыс білдіреміз. Сарыағаш – шекаралық станция болғандықтан, салтанатты қабылдау шарасын осында өткіздік. Ендігі жерде жылжымалы құрам тоғыз жолдың торабы Арыс станциясындағы сұрыптау паркінде таратылып, су басқан өңірлерге жөнетіледі, – дейді Нұрдәулет Тасбалтаұлы.
Айта кетейік, Тәжікстан мемлекеті 59 вагоннан бөлек, 13 жүк көлігін жолға салып, жалпы салмағы 3 500 тонна гуманитарлық көмек жіберген. Оның басым бөлігі батыс аймақтарға жеткізіледі деп жоспарланып отыр.