Прокурорлар вокзалдағы бизнес өкілдерімен кездесті

«Нұрлы жол» теміржол вокзалында Көліктегі прокуратура өкілдері шағын және орта бизнесін жүргізіп отырған кәсіпкерлермен кездесу өткізді.

ҚР Бас прокуратурасының Құқықтық статистика және арнайы есепке алу жөніндегі комитетінің көліктегі департаменті мамандары вокзал кешенінде бизнесін жүргізіп отырған кәсіпкерлерге мемлекеттік органдар мен кәсіпкерлік субъектілердің қызметіне тексеру жүргізу тәртібі мен негіздерін түсіндірді.  «Бүгінгі жиынның басты мақсаты – кәсіпкерлердің құқықтары мен мүдделерін қорғау. Мемлекеттік органдар тарапынан тексерістер болғанда, тексерушілердің лауазымдық қызметтерін асыра пайдалануына немесе қандай да бір заңсыз шаралар қолдануына жол бермеу. Қазір қолданыстағы Кәсіпкерлік кодексіне көптеген өзгерістер енгізілді. Кәсіпкерлерге осы өзгерістерді жеткізу, таныстыру. Өйткені тексерістің түрі көп. Жоспарлы, жоспарсыз немесе прокурордың талаптарымен жүргізілетін тексеріс бар. Міне, осының бәрі Көліктегі департаменттің «Тексеру субъектілері мен объектілерінің бірыңғай тізілімі» ақпараттық жүйесінде тіркеледі. Тіркеу номері электронды түрде шығарылады. Ол тіркеу номері арқылы әрбір кәсіпкер өзіне тексеріске шыққан мерзімін, негізін, Құқықтық статистика және арнайы есепке алу жөніндегі комитетінің көліктегі департаментінің kamkor.kz деген порталы бар, сол порталда тексеріс номерін теріп, тексерістің қашан және қай мезгілге ашылғанын, соңғы шешімін көре алады», – деді Көліктегі департаменттің аға прокуроры Талғат Айнабеков.  

Ал тексеріс жоғарыдағы ақпараттық жүйеде тіркелмей жүргізілген жағдайда Көліктегі департаменттің қызметкерлеріне хабарласып, мән-жайды білуге болады. Жалпы кәсіпкерлер заңсыз тексерістен өз құқықтарын қорғау үшін Кәсіпкерлік кодекске сәйкес жүргізетін тексеріс түрлерімен жете таныс болғаны абзал деп кеңес береді құқыққорғау өкілдері.