Қызылордалық 20 бала «Туған жерге саяхат» турымен Астанаға аттанды
Қызылорда облысы бойынша меншікті тілші
Сырдың ми қайнатар аптап ыстығында салқын самалы ескен Арқаның төрінде дем алып, серуендеп қайту үшін қызылордалық 20 бала «Туған жерге саяхат» турымен Астанаға аттанды.
Елордаға ұшақпен ұшатындарын естіген балалардың қуаныштарында шек жоқ. Әуежайға арнайы көлікпен жеткізілген оларды ата-аналары шығарып салып, ақ жол тіледі.
«Қазкөліккәсіп» ҚБ мен бөлімше басшылығының қолдауымен ұйымдастырылған балалар саяхатқа көп балалы отбасының, жалғызбасты аналардың, толық емес отбасының балаларына, үздік сабақ үлгерімімен ерекшеленген оқу озаттарына бірінші кезекте мүмкіндік берілді.
– Қызылорда қосалқы бөліміне қарасты Шиелі мен Сексеуіл станциялары арасындағы мекеме теміржолшыларының балалары «Туған жерге саяхат» турымен 3 күн Астана қаласын тамашалап қайтады. Кәсіподақ ұйымының қызметкерлері Салтанат Махмутова мен Ғалия Қожахметова балалардың қауіпсіздігіне жауапты болады, – деді Қызылорда қосалқы бөлімі кәсіподақ ұйымының төрағасы Мұхтар Өмірзақұлы.
Қызылорда қосалқы бөлімінің кадр жетекшісі Орынкүл Нұрмашқызы биылғы жазда аймақ теміржолшыларының 200-ден астам бүлдіршіні еліміздегі түрлі балаларды сауықтыру лагерлерінде демалатынын жеткізді. Балалар үшін жаз қызығы тамыз айының соңына дейін жалғасатын көрінеді. Маусым айынан бастап 100 шақты бала «Машат» және «Тау самалы» сауықтыру лагерінде демалып келсе, бүгін кешкілік тағы 50 бала кезекті демалысқа аттанбақ.
