Жаз жайнатып, күн күлдіріп...
Маңғыстау облысы бойынша меншікті тілші
Маңғыстаулық теміржолшылардың балалары жаз қызығын Оралдағы «Атамекен» лагерінде өткізіп жатыр. Жуырда алғашқы топпен аттанған елу бала оралып, келесі лек аттанды.
Балаларға бірнеше жол бастаушы мен медицина қызметкері бекітілген. Мұнан бөлек жергілікті жерде де демалу мүмкіндігі қарастырылған. Қазір тағы бір топ Ақтау қаласындағы «Балдәурен» лагерінде қызықты күндерін өткізуде.
– Биыл елу баладан екі лек Оралда демалдырамыз. Оларға пойыздың купе вагондарына алдын ала билет алынды. Қауіпсіздігі, ас-суына дейін қадағалауда болды. Лагерьге кетпес бұрын балалардың медициналық деректері мұқият тексеріліп, денсаулық жағдайы бақыланып, дайындықтың жауапкершілігі өте жоғары болды. Балаларымыз жол бойы ауырмай-сырқамай жетті. Лагерьде жақсы тынығып, достар арттырып, көрмеген жерлерін көріп, көңілді оралды, – дейді балаларды Оралдағы лагерьге бастап барған Маңғыстау қосалқы бөлімінің қызметкері Зәуре Қосымбаева.
