Медицина мамандары ақпараттық дәріс өтті
![](https://rail-news.kz/uploads/2024/08/09/qVOwIfWW03ClgEtvk0Q54WRuCOlqVx74imbQBZQX.jpg)
![](https://rail-news.kz/img/noimg.png)
«Қазақстан теміржолшысы» газетінің тілшісі
Кеше ұлттық компанияның қызметкерлеріне арнап медицина мамандары жілік майы гемопоэтикалық дің жасушасы донорлығына орай дәріс өткізді.
Жиынды ашқан Әлеуметтік саясат департаментінің бас менеджері Ақмарал Байғабылова қызметкерлер үшін қоғамдық және қайырымдылық жұмыстардан бөлек осындай танымдық және ақпараттық дәрістердің де маңыздылығын атап өтті. Трансплатацияны дамыту және жілік майы доноры регистрі бөлімшесінің меңгерушісі Анар Серікқызы қатысушыларға жілік майы доноры болу – соған шешім қабылдаған кез келген адам үшін зор жауапкершілік екенін алға тартты.
– Жілік майы доноры регистрі дегеніміз – трансплатацияны қажет ететін науқастарға ерікті және қайтарымсыз, ақысыз түрде көмек көрсетіп, гемопоэтикалық дің жасушасын беруде әлеуетті донор болатын азаматтардың деректері орналасқан ақпараттық платформа. Донор болу үшін Астанадағы қалалық қан орталығына хабарласу керек 18-45 жас аралығындағы салмағы 50 келіден асатын адамдар донор бола алады. Сонымен қатар олардың бойында онкологиялық, басқа да қауіпті аурулар болмауы керек, – деп түсіндірді А. Серікқызы.
Қатысушылар осы талаптарға сай өздерінің деректерін беру үшін анкета толтырды. Алайда науқас адамға барлық адамның жілік май жасушасы сәйкес келе бермейді. Жер бетінде бір адамның генетикалық «егізін» табу 10 мыңнан 1 жағдай ғана сай келеді екен. Сондықтан маманның айтуынша, аталған регистрде неғұрлым көбірек донор тіркеулі болса, соғұрлым науқасты құтқару ықтималдығы жоғары болады.