Теміржолшы жастар игілікті іс жасауда

Теміржолшы жастар қашанда игілікті іс жасап, қайырымдылық шараларынан қалыс қалмаған. Осал топтағы жандарды қолдан келгенше қолдап жүретіндер қатарында түбектік жас толқын да бар.

Жуырда олар Ақтау қаласында орналасқан №3 арнаулы әлеуметтік қызметтер көрсету орталығының ауласында сенбілік ұйымдастырды. Атшаптырым орталықтың ауласын «жылан жалағандай» қылып, шөп-шалаң мен қоқыстан тазартқан жас теміржолшылар тірлігіне көз сүйсінді.  

Бұл қаладағы ерекше балалар тәрбиеленетін орталық болатын. Бүгінгі күні онда тоқсан бала өмір сүреді. Теміржолшы жастарға олардың біразының тағдыры да, өздері де жақсы таныс. Мерекелерде барып арнайы кештер ұйымдастырып, балақайлардың көңілін аулап жүретін жастар бұл жолы да құр қол бармады. Арнайы су жылытатын Аристон құрылғысын алып беріп, жеміс-жидектер жеткізді.

– Мүмкіндік болса біреуді қуантып, кімге болса да жан жылулығын сыйлағанға не жетсін. Оның ішінде баланың орны бөлек. Біздің теміржолшы жастар осы орталыққа үнемі қолдан келгенше көмектеседі. Жиі келіп, қал-жағдайларын, мұқтаждықтарын біліп тұрамыз. Бір келгенімізде су жылытатын құрылғысы істен шығып қалған екен. Бүгін сол құрылғыны ала келіп әрі ауланы тазалап, сенбілік ұйымдастырдық. Орталық қызметкерлері де, балалар да риза. Алғыс айтып жатыр. Алғыс алу – ол біз үшін үлкен мерей, – дейді маңғыстаулық теміржолшы жастардың өкілі, вагон қараушы Қуатбек Көпбаев.