Қарттар үйіндегі теміржолшы
Ақтөбе облысы бойынша меншікті тілші
93 жастағы Дмитрий Кушнир Ақтөбедегі қарттар үйінде тұрады. Шахмат ойнауды күнделікті әдетіне айналдырған қария 33 жыл теміржол саласында еңбек еткен.
Теміржолшы темір тәртіпке дағдыланған әдетін бұл жерде де жоғалтпаған. Сағатпен шахмат ойнап, сағатпен таза ауада серуендейді. Қарттар үйіне келген оқушылар мен жастарды ойынға шақырып, ұтқырлық стратегиясын үйретеді.
«Қазақстанда туып-өстім. Благодарный ауылында тұрдым. Оқыдым. Екінші дүниежүзілік соғыс кезінде жұмыс істеп бастадым. Мал бағып, көкөніс жинадық. Кейін диірменде жұмыс істедім. Қапқа бидай толтырып, оны әйелдер тікті. Ағам әскерден оралған соң мен теміржол саласына кеттім. 41-разъезде жүк тасымалдаушы, сосын вагон тіркеуші болдым. Бір жылдан соң вагон құрастырушы болып ауыстым. Теміржол оқытты, жұмыс берді, үй берді. Сол жерден зейнетке шыққанша 33 жыл еңбек еттім, – дейді бір жылдан бері қарттар үйінде тұрып жатқан кешегі теміржолшы.
Қарияның бес баласы да бүгінде өмірде жоқ. Қарттар үйі қызметкерлерінің айтуынша, немересіне өзі барып тұрады. Ақсақалдың жүрісі тың, қимыл-қозғалысы ширақ. Базарға барып өзіне ұнаған заттарды сатып алады. Қызметкерлер қарияның өзіне өте талапшыл, қатаң режим сақтайтынын айтады. Таңертең тамақ алдында міндетті түрде таза ауада жүріп қайтады екен.
«Әріптестері келіп тұрады. Ондай кезде ата қуанып қалады. Теміржолшылар күні бір топ адам келді сый-сияпаттарын алып», – деді қарттар үйінің қызметкері Айнұр Кипанова.
Ақтөбедегі қарттар үйінде тағдыры әртүрлі 223 адам тұрады. Оның ішінде 137 қарт, 86 мүгедек жан бар.