Қазақ тілінде сөйлеу клубының кезекті отырысы өтті
«Қазақстан теміржолшысы» газетінің тілшісі
ҚТЖ-да қазақ тілінде сөйлеу клубының кезекті отырысы «Мақал – сөздің мәйегі» тақырыбымен өтті. Қатысушылар мақал-мәтел айтудан жарысты және ән мен күй тыңдап, рухани азық алды.
Алдымен жиналғандар 4 топқа бөлініп, экранда берілген кездейсоқ дөңгелек арқылы топ аттарын қойды. «Отан», «Білім», «Еңбек», «Адамгершілік» деп аталған топтар өз атауларына байланысты мақал-мәтелдер айтып жарысты. Оларға 3 минут уақыт беріліп, сол уақыттың ішінде неғұрлым көп мақал тапқан топ ұтты. Екінші кезеңінде Wordwall интерактивті тапсырма құру сервисі арқылы ситуациялық тапсырмаларды орындау тапсырылды. Әр топтан екі адам шығып, өрісті ашу арқылы тапсырма таңдап сұхбат жүргізді.
Келесі тапсырмада қатысушылар экрандағы суреттер бойынша қандай мақал жасырынғанын дұрыс тауып айтуы керек болды. Әр тақырып төңірегінде мақалдар қоса отырып 2-3 сөйлемнен тұратын шағын әңгіме құрайды. Одан әрі Флэш-карталар ойыны арқылы сұрақтарға жауап беру тапсырмасы орындалды. Белсенді қатысушылар мен топтар бағалы сыйлықтар беріліп, жасы үлкен қатысушыларға оюлы орамалдар табысталды.