Ерте зейнетке шықты
«Қазақстан теміржолшысы» газетінің тілшісі
«ҚТЖ» ҰК» АҚ филиалы – Астана жол дистанциясының отыздан астам жол монтері жұмыс беруші есебінен жүргізілетін ерте зейнетке шығу құқығын пайдаланды.
Зиянды жағдайда жұмыс істейтін мамандар ҚР Әлеуметтік Кодекстің 2023 жылдың 21 желтоқсанында толықтырылып, осы жылдың 1 қаңтарында күшіне енген – яғни зиянды еңбек жағдайында жұмыс істейтін тұлғаларды әлеуметтік қорғау мәселелерін жаңаша реттейтін жаңа 14-1 тарауына сәйкес 55 жастан зейнетақыға шығу мүмкіндігіне ие болып отыр. Бұл жерде атап өтерлігі, ерте зейнетақыға шыққандарға берілетін жәрдемақы жұмыс беруші есебінен жүргізіледі. Ал 63 жасқа толғаннан кейін мемлекеттік зейнетақы тағайындалады.
– Астана жол дистанциясы бойынша биыл жыл басынан бері 37 адам осы мүмкіндікті пайдаланып, 55 жастан зейнетке шығып отыр. Олар төрт мамандық бойынша, атап айтқанда жол монтері, бригадир, темір ұстасы, компрессор құрылғысының машинисі мамандықтарының иегерлері. Бүгін біз олардың басын қосып, салтанатты түрде зейнетке шығарып салып отырмыз. Жиырма жылдан астам еңбек еткен еңбеккерлерге «Астана жол дистанциясының еңбек ардагері» төсбелгісін табыстап, алғыс хатпен және кәсіподақ ұйымы атынан ақшалай-заттай сыйлықтармен марапаттадық, – деп атап өтті дистанция бастығы Дәурен Қабас.
Бұл арада ескеретін жайт, зиянды тізім бойынша тек жұмыс өтілі ғана емес, сондай-ақ міндетті кәсіби зейнетақы жарнасы аудармаларының 87 ай, яғни 7 жыл жүргізілуі есепке алынбақ.