Өзін мойындатқан жан

«ҚТЖ-Жүк тасымалы» ЖШС ұжымы Тасымалдау үдерісінің технологиялық жүйелері департаментінің менеджері Қайыргелді Макишевті құрметті демалысқа шығарып салды.

Еңбекпен өрілген ғұмырының отыз жылдан астамын теміржол көлігіне арнаған Қайыргелді Макишев алып саладағы еңбек жолын Тың темір жолында инженер-электроншы болып бастаған.  

«Қайыргелді Қапанұлы өзін жоғары білікті маман ретінде көрсете білді, ол жаңа технологияларды игеріп қана қоймай, оларды тәжірибеде енгізуге көп көмектесті. Есептеу орталығында жұмыс істей жүріп, білікті маман озық ақпараттық технологияларды табысты енгізіп, дамыта білді. Бұл өз кезегінде теміржол тасымалының жұмыс тиімділігін анағұрлым арттырды», – дейді кейіпкеріміз туралы әріптестері.  

Қайрекең еңбек жолында әртүрлі қызмет тізгінін ұстай жүріп, кәсіби өсудің бірнеше кезеңдерінен өтті. Мәселен, Солтүстік өңірлік ақпараттық-есептеу орталығының бөлім бастығы, дербес электронды есептеуіш машиналар бөлімі бастығының орынбасары, Ақмола облыстық ақпараттық-есептеу орталығының бөлім бастығы сияқты тағысын тағы лауазымдық міндеттерді атқарды. Тасымалдау процесі дирекциясының ақпараттық жүйелерді жобалау және енгізу бөлімін де басқарды. Оның жұмысы тасымалдау үдерісінің ақпараттандыру процесін жетілдірумен байланысты еді, бұл жүк тасымалдау қызметінің сенімділігі мен жылдамдығын арттыруға ықпал етті. Қайыргелді Қапанұлы құрметті демалысқа шығар алдында отын-энергетикалық ресурстарды нормалау процестерін талдау құралы ретінде отынның позициялық нормасы бойынша бақылау тақтасын әзірлеумен айналысты.  

Әріптестері Қайыргелді Макишевті өз ісінің білгірі, үнемі ізденісте жүретін білімсүйгіш адам ретінде дәріптесе, жастар жағы көп жылғы тәжірибесімен бөлісіп, үйретуден жалықпаған тәлімгер ұстаз, қамқоршы аға ретінде ерекше құрметтейді. Расында да кейіпкеріміздің темір жолда ақпараттық технологиялар мен жүйелерді дамытудағы зор үлесін кешегі-бүгінгі сала мамандары бірауыздан мойындайды.