Жұмысшы мамандықтарына мәртебе беріледі
Тағы бір жыл тарих жылнамасын толықтырып, жаңа жылға аяқ бастық. Мемлекет басшысы 2025 жылды «Жұмысшы мамандықтары жылы» деп жариялады. Президент, осылайша, жұмысшы мамандықтарына айрықша мәртебе беріп, маңызын арттырып отыр.
Теміржол саласында жұмысшы кәсібі иелері қашан да беделге, қадір-құрметке ие. Олар – жолшылар, вагон қараушылар, станция кезекшілері мен пойыз құрастырушылар, машинистер мен жолсеріктер, т.т. алып салада жүк және жолаушылар тасымалының қауіпсіз қозғалысын қамтамасыз ету жолында тәулік бойы тынымсыз тер төгіп жүрген еңбек адамдары.
Сарапшылар Қазақстан үшін өткен жыл табысты болды деп қорытынды жасайды. Өндіріс саласында ауқымды жобалар жүзеге асырылып, қайта өңдеу секторы қарқынды дами бастады. Ғылымды қаржыландыру көлемі артып, әлеуметтік сала қызметкерлеріне елеулі қолдау көрсетіліп жатыр. Елдің экономикалық дамуы мен қоғамдық ахуалға әсерін тигізер бірқатар күрделі де қиын жағдайлармен бетпе-бет келгенімен, Қазақстан реформаларды тиімді жалғастырып, табысты жыл негізін қалай білді деп бағалауға болады. Бұл туралы Мемлекет басшысы қаңтардың алғашқы күндері «Ана тілі» республикалық қоғамдық-саяси газетіне берген сұхбатында жан-жақты баяндайды.
– Біз еңбек адамының абырой-беделін көтеріп, еңбекқорлық, кәсібилік сияқты құндылықтарды дәріптеу үшін әлі талай шаруа атқаруымыз керек. Экономиканың көптеген саласында жұмыс қолы жетіспейді. Жұмысшы мамандықтар мол әрі тез табыс табу тұрғысынан қызықтыра қоймауы мүмкін. Бірақ бұл мамандықтардың еңбек нарығында сұранысқа ие болатынына да, қоғамдағы мәртебесі жоғары болатынына да кепілдік бар. Мен кәсіпорындарды аралаған кезде жастарды жиі жолықтырамын. Олардың арасында жұмысшы әулеттерінің өкілдері көп екені көңіл қуантады. Мемлекеттің міндеті – жас мамандарға материалдық және моральдық жағынан көмектесу, – деді жұмысшы мамандықтары жылына байланысты пікір білдірген Қазақстан Президенті Қасым-Жомарт Тоқаев.
Өз кезегінде «Қазақстан теміржолшысы» газеті алғашқы санынан бастап Жұмысшы мамандықтары жылына орай «Еңбек адамы» атты жаңа айдар ашып, жоғарыдағы кәсіп иелері жайлы очерктер мен суреттемелерді жариялауды бастайды.
Меруерт Есенбек