Әлеуметтік төлемдер тәртібі түсіндірілді
Түркістан облысы бойынша меншікті тілші
Түркістанда теміржолшылардың басқосуы өтіп, сала еңбеккерлеріне компания тарапынан жасалып отырған жағдай, әлеуметтік төлемдер тәртібі мен талаптарын кеңінен түсіндіру арқылы әлеуметтік тұрақтылыққа қолжеткізудің тетіктері талқыланды.
Станция ғимаратында өткен жиынға өңірдегі ПЧ, ШЧ, ЭЧ мекемелерінің қатардағы жұмысшылары қатысып, оларға жан-жақты түсіндіру жұмыстары жүргізілді.
Жиында Шымкент магистральдық желі бөлімшесінің кадр бөлімінің басшысы Балжан Назарова мен жалақы есептеу бөлімінің басшысы Ерлан Қорыспаев және бөлімшенің еңбек қорғау секторының басшысы Ерлан Серперов сөз алып, теміржолшылардың сұрақ-сауалдарына жауап берді. Жиында теміржолшыларға ұсынылып жатқан жеңілдіктер мен түрлі әлеуметтік көмектер, жалақыдан бөлек, биылдан бастап енгізіліп отырған қосымша сыйақы берудің негізгі тәртіптері, оған қоса жұмысшыларды марапаттау арқылы ынталандыру тетіктері кеңінен түсіндірілді.
– Айталық, егер қызметкер компанияда 10 жыл бойы үздіксіз еңбек еткен болса, оған жылына бір рет жалақыдан бөлек қаржылай сыйақы тағайындалып, арнайы кеуде белгісімен марапатталады. Ал еңбек өтілі әрбір он жылға көбейген сайын көрсетілетін сый-құрмет көлемі де екі еселене түседі, – деді Е.Серперов.
Сол сияқты жиында жақын қашықтықтағы мекемелерге іссапармен барған азаматтарға жолсапар шығынын өтеу мен оларға берілетін арнайы киімдердің сапасы да тақырыптан тыс қалмады. Жалпы, оңтүстік өңір қысы жайлы, жазы ыстық өңір болғандықтан, жұқа матадан тігілген арнайы киімге ауысу мәселесі де талқыланды.
Жалпы, Түркістан облысындағы теміржол мекемелерінің салаға жауапты жетекшілері жұмысшылардың құқықтары мен мүдделерін қорғау бойынша мұндай басқосуларды тұрақты түрде ұйымдастырып келеді. Онда еңбек заңнамасының сақталуы мен ұжымдық шарт талаптарының орындалуы жіті назарға алынады.