Маңғыстаулық жастар игі іс атқарды
Маңғыстау облысы бойынша меншікті тілші
Жақсылықтың үлкен кішісі болмайды. Жаны жүдеп тұрғанда біреуге айтылған бір ауыз жылы сөздің өзі неге тең. Қажет кезі қол ұшын созып, қолтығынан демеп жіберу де адамгершіліктің ізгі көрінісі. Маңғыстау теміржолының жастары да жуырда сондай азаматтық іс істеп, дамыл таппай қармен күресіп жатқан жандарға «жылу» таратты.
Қыстың соңғы күндері Маңғыстауға бір тоқсан бойы түспеген қар түсіп, табиғат тосынсый жасады. Арнайы тазалау қызмет өкілдері енді көктемге жеттік ау деп арқаны кеңге сала бергенде арқаның аязы мен қары батысқа бұрылып, бір сәтте барлық жерді ақ кілемге орады. Коммуналдық қызметтер тыным-таппай еңбек етіп, қаланы қардан тазалап жатқанда түбек теміржолының жастары да қол қусырып қарап қала алмады. Қолға күрегін алып қаладағы қарды аршып жатқан аға-апалары мен тоқтаусыз қатынап, қарды қаладан шығарып жүрген жүк көлігі жүргізушілеріне ыстық шай мен дәмді бәліш таратты. Сақылдаған сары аязда, суық қарды күреп жүрген жандарға жылулық таратып, алғыстарын алды. Қыстың соңғы күндерін солай өткізген жастар, Рамазан айына да қайырымдылық іс-шаралар жоспарын дайындап қойыпты.