Сайөтес станциясында желілік полиция жолаушыларды ақпараттандыру шарасын өткізді
Маңғыстау облысы бойынша меншікті тілші
Заман дамыған сайын алаяқтықтың да неше түрлісі шығып жатыр. Кеңінен таралғандарының бір түрі – ол интернет алаяқтығы. Сондықтан желілік полиция өкілдері жолаушыларды алаяқтар құрығына түсіп қалмауға шақырады.
Жақында Сайөтес станциясындағы желілік полиция бөлімшесінің инспекторлары пойыздардағы жолаушылармен кездесті. Станциядан өтіп жатқан жолаушылар вагондарын аралап, вокзал, перрондағы тұрғындарға жаңадан шығып жатқан интернет алаяқтықтың айла-тәсілдері туралы түсіндіріп, ескерту парақтарын таратты.
– Қазір адамдар күнделікті өмірде интернет ресурстарын кеңінен пайдаланады. Соның ішінде банктік қолданбалар мен сату веб-сайттарын көп қолданады. Сондықтан алаяқтардың арбауына жиі ілінеді. Өкінішке орай, статистика бойынша бұл факт көбеймесе, азайып жатқаны жоқ. Осыған байланысты Сайөтес станциясындағы желілік полиция бөлімшесінің қызметкерлері жолаушылар пойыздарына шығып, халыққа түсіндірулер жүргізуде. Күніне станциядан қаншама жолаушы өтеді. Соның бірі болмаса бірі ескертулерден қажетті ақпарат алып, күдікті болған сайттар мен қосымшаларды, басқа да дүниелерді пайдаланарда ойланса, біз үшін үлкен жетістік, – дейді Сайөтес станциясындағы желілік полиция бөлімшесі басшысы Нұрлыбек Рахметов.
Айтуынша, профилакти калық іс-шара барысында азаматтарға интернет сайттарын пайдаланған кезде немесе белгісіз нөмірлерден қоңыраулар келгенде сақ болуды, SMS кодтары мен құпия сөздерді ешкімге, тіпті банк қызметкеріне де айтуға болмайтынын, алдын ала төлем жасамау, SMS арқылы келген бағдарламаларды жүктеп алудан аулақ болу сияқты мағлұматтар берген.
