«Саламатты Қазақстан» медициналық пойызы солтүстікті аралап жүр
«Қазақстан теміржолшысы» газетінің тілшісі
«Саламатты Қазақстан» медициналық пойызы Солтүстік Қазақстан облысына келді. Мұнда екі апта аялдайтын ақжолтай пойыз шалғайдағы елді мекендер тұрғындарына қызмет көрсетуді бастап кетті.
Жыл басынан бері құрам 20 мың шақырымнан астам жол жүріп өтті. Солтүстік Қазақстан және Ақмола облыстарындағы аялдамалардың кестесін келтірсек: Ақсуат – 7 тамыз, Сулы – 8-10 тамыз, Қайранкел – 10- 11 тамыз, Чаглинка – 13 тамыз, Тайынша – 14 тамыз, Қазан – 15 тамыз, Чкалов – 16 тамыз, Ащыкөл – 17 тамыз, Даут – 18 тамыз, Талшық – 19 тамыз, Қызыл Ту – 20 тамыз, Макинкада 22-23 тамыз аялдамақ.
Пойызда ультрадыбыстық, рентген, ЭКГ, зертхана, т.т. диагностикалық зерттеулер жүргізіп, негізгі мамандықтағы дәрігерлердің қабылдауы, қажет болған жағдайда шағын хирургиялық операциялар жасау мүмкіндігі бар. Сондай-ақ тұрғындар заңгерлерден, медиаторлардан және психологтардан әлеуметтік және құқықтық мәселелер бойынша тегін консультация ала алады.
Әрі қарай пойыз Ақмола, Павлодар, Шығыс Қазақстан және Абай облыстарына барады.