Медициналық пойыз Абай елін аралап жүр
Абай облысы бойынша меншікті тілші
«Саламатты Қазақстан» медициналық пойызы өткен аптаның соңында Абай еліне де келіп жетті. Осыған дейін Павлодар бөлімшесінен қайтар жолда Семейдің Дегелең, Белағаш, Ауыл станцияларына аялдап, Өске- мен өңіріне жол тартқан еді.
Осылайша шығысты шарлап шыққан медициналық пойыз Жаңғызтөбе станциясына келіп жетіп, одан әрі Жарма станциясында да қабылдау жүргізді. Айта кетерлігі, екі станция да облыс орталығынан, үлкен қалалардан біршама шалғайда жатыр. Сол себепті кәсіби мамандарға қаралушы жергілікті тұрғындар саны да көп болды.
Қыркүйектің 26-29 күндері өткен қабылдауға іргелес шағын станциялар мен жол айрықтарында тұратын теміржолшылар да ат арытып арнайы келіп, дәрігерлерге қаралды. Байырғы Семей ядролық сынақ полигоны аумағына жақын жатқан, сәйкесінше, денсаулықтарында сәулелену себепті кінәраттары бар тұрғындар медициналық тексерулерге әрдайым мұқтаж.
Медицина пойызының құрамындағы дәрігерлер қатарында терапевт, хирург, педиатр, кардиолог, стоматолог, офтальмолог, ЛОР, гинеколог, психолог, невропатолог, УЗИ дәрігері, рентгенолог мамандар қызмет көрсетуде. Сонымен бірге медиаторлар мен заңгерлер де жұмыс жүргізді.
«Саламатты Қазақстан» медициналық пойызындағы мамандардың тиімді жұмыс жүргізулері үшін барлық қолайлы жағдай жасалды. Дәрігерлердің де, жергілікті тұрғындардың да көңіл күйлері жоғары. Себебі, шалғай станция тұрғындары үшін қажеттілігі аса жоғары медициналық қызметтер ЭКГ, УЗИ, рентген, маммография және зертханалық талдаулар жүргізіліп, қажетті жағдайда тіпті, шағын хирургиялық операциялар да жасалуда. Тексерудің мұндай түрлерін жасату үшін станциялар тұрғындары бірнеше күн уақыттарын бөліп, аудан орталықтарына баруға мәжбүр болатын еді, – дейді пойыз жұмысының басы-қасында жүрген Жаңғызтөбе станциясының бастығы, Жарма аудандық мәслихатының депутаты Азамат Нұрғалиев.
Айта кетерлігі сол, жергілікті теміржолшылар барлық медициналық қызметтердің тегін екендігіне, міндетті әлеуметтік медициналық сақтандыру және кепілдендірілген тегін көмек аясында көрсетілетініне зор ризашылық білдіруде.
Медициналық пойыз қыркүйектің 30-мен қазанның 1-і күндері аралығында бөлімшедегі Таңсық станциясында аялдап, қызмет көрсетпек. Одан әрі қарай Алматы бөлімшесіне жол тартатын болады.