Қазыналы қарттарға – құрмет пен тағзым
Маңғыстау облысы бойынша меншікті тілші
Маңғыстауда бүкіл саналы ғұмырын түбек теміржолын түлетуге сарп еткен қариялардың басын қосқан бір тамаша кеш өтті.
Маңғыстау жүк тасымалы бөлімшесі директоры Нәжімеден Ғұбашов пен Маңғыстау магистральдық желі бөлімшесінің директоры Ерназар Ізтұрғанов, Орталық теміржолшылар кәсіби одағының өңірдегі өкілі Сәрсенбай Есенқұлов сөз сөйлеп, аға буынға алғыстары мен құрметтерін, ең ізгі тілектерін жеткізді.
Қазіргі ізбасарларының ақ ниетпен жайған дастарханынан дәм татып, көптен көрмеген жандармен дидарласқан ардагерлер түбек теміржолының тарихынан сыр шертіп, өткен-кеткенді еске алды. Ардагерлер салада болып жатқан ілкімді істерге қуанып, өзгерістерден хабардар жүретінін жеткізіп, ақыл-кеңесін айтты. Теміржолшы жастардың өнерін тамашалап, көңілді ойынға қатысып, сый-сияпатқа кенелген қариялар өте риза болды.
– Осында жиылған әр жан түбек теміржолына өз кірпішін қалап, күш-қайраты жеткенше еңбек етті. Олардың еңбегі ешқашан ұмытылмайды. Адам жасы ұлғайған сайын қатарластарын көруді, әңгімелесуді аңсайтыны рас. Бүгінгі кездесуде ардагерлеріміздің көңілі көтеріліп, жүзі жадырап отырғанын көрудің өзі бір ғанибет. Қарияларымыз аман болсын! – дейді Маңғыстау жүк тасымалы бөлімшесінің кәсіподақ төрағасы Әзірбай Тұрмағанбетов.