Қызыққа толы күн
Маңғыстау облысы бойынша меншікті тілші
Балаларды қорғау күніне арналған іс-шаралар Маңғыстау теміржолында демалыс күндері басталып кетті. Балақайлардың көңілін көтеріп, естен кетпестей мереке сыйлау үшін әр мекеме өз сценарийін дайындапты.
Маңғыстау ЖТ бойынша кәсіподақ төрағасы Әзірбай Тұрмағанбетовтің айтуынша, жүк тасымалы бөлімшесіне қарасты мекемелерде жалпы саны алты жүзден астам бала қамтылған. Атаулы күнге орай Маңғыстау станциясында балаларды кинотеатрға алып барса, Бейнеуде «Сәлем кидс» ойын-сауық орталығында бірнеше сағат бойына көңіл көтеруге мүмкіндік берілді.
Жаңаөзендік бүлдіршіндер де балаларға арналған орталықта ойын ойнап, қызыққа батты. Болашақ станциясында аула клубында арнайы кеш ұйымдастырып, сыйлықтар таратты. Шетпе станциясында балақайлар қуыршақ театрының кейіпкерлерін тамашалап, ертегілердің куәсі болды.
Маңғыстау магистральдық желі бөлімшесіне қарасты мекемелерде 1100 бала осындай бағыттағы кештерде көңіл көтерді. Қысқасы, қызыққа толы бұл күн талай баланың жүрегінде естен кетпес естеліктермен сақталып қалды.