Әрқашан күн сөнбесін...

Кешегі кеңес елінің балаларының гимніне айналған ән Шу аспанында бұл күні тағы қалықтады. Балаларды қорғау күніне орай Шу белгі беру және байланыс дистанциясының кәсіподақ ұйымы «Бақытты шақтар» атты мәдени-спорттық іс-шара ұйымдастырды.

Түрлі ертегі кейіпкерлері балғындарға ойын ұйымдастырып, шоу көрсетті, ойыншықтар мен тегін балмұздақ таратылды. Асфальтқа сурет салудан байқау өткізіп, эстафеталық жарыстардың жүлдегерлері де сыйлықсыз қалған жоқ.

– Өткен оқу жылында бірнеше теміржолшылар әулетінің талантты балалары республикалық, халықаралық өнер-білім бәсекесінде топ жарып, жүлдегер атанды. Мерекеге орай сондай 4 оқушы «ҚТЖ» ҰК» АҚ басқарма төрағасы Талғат Алдыбергеновтің Алғыс хатымен марапатталып, бағалы сыйлық алды. Ал мерекелік ертеңгілікке көпбалалы отбасылардан шыққан 50 баланы шақырып, ойыншықтар мен түрлі тәттілер сыйлап, қуанттық, – дейді Шу белгі беру және байланыс дистанциясының кәсіподақ ұйымының төрағасы Әзімбек Көкімов.  

Алғыс хатпен марапатталған жасөспірімдердің үшеуі көпбалалы отбасыдан шыққан. Дистанцияның аға электромеханиктері Мадияр Құралиевтің қызы Назерке Серікбек екі бірдей байқауда топ жарса, Серікжан Базарқұловтың ұлы Ерасыл Сейітқазы облыс оқушылары арасында «Ең үздік кітап оқушы» атанып, білім бәсекесінде жүлдегер атанған. Электромеханик Дамирғали Оңланбаевтың қызы Аруна Батырғали төрт конкуста үздіктер қатарынан көрінсе, жетекші инженер Данеля Жамашеваның баласы Алижан Рахман сегіз бірдей спорттық жарыста топ жарған.  

Мерекеге орай Жамбыл ЖТ кәсіподақ ұйымы да балаларға ойын-сауық орталығында екі күндік демалыс ұйымдастырды. Балалар көтеріңкі көңіл-күй сыйлайтын түрлі ойындарға, спорттық жарыстар мен танымдық бағдарламаларға қатысып, өнерлерін көрсетіп, түрлі марапаттар мен сыйлықтарға ие болды.  

– Әрбір ата-ана ұл-қызының бақытты балалық шағын қамтамасыз ету үшін тер төгіп жүр. Мерекеге орай теміржолшылардың 5-тен 12 жасқа дейінгі балаларына ойын-сауық орталығына тегін демалыс ұйымдастырып, екі күнде 1100-ге жуық балаға қуаныш сыйладық. Тегін балмұздақ, түрлі тәттілер таратылып, жеңімпаздарға ойыншықтар сыйладық, – дейді «ҚТЖ-Жүк тасымалы» ЖШС «Жамбыл» филиалы кәсіподақ ұйымының төрағасы Серік Наурызбаев.