ҚТЖ теміржолшылардың әлеуметтік пакетін жақсартты
«Қазақстан темір жолы» ҰК» АҚ еліміздің ірі жұмыс берушісі бола отырып, тұрақты негізде теміржолшылардың әлеуметтік пакетін жақсартуға ерекше көңіл бөліп келеді. Бұл жұмыстың негізгі бағыттарының бірі – теміржол қызметкерлерінің демалысын ұйымдастыру.
Қызметкерлердің әлеуметтік пакетін жақсарту бойынша жоспарлы жұмыс шеңберінде Санаторлық-курорттық сауықтыру қағидаларына бірқатар түбегейлі өзгерістер мен толықтырулар енгізілді. Ең басты жаңалық – енді жолдамалар мен қызметкерлерге сауықтыруға материалдық көмек жыл сайын белгіленген лимит шеңберінде беріледі. Бұрын теміржолшылар бұл мүмкіндікті 24 айда бір рет қана пайдалана алатын.
Бұдан басқа, төлем тәртібі де түзетілді. 2026 жылғы 1 қаңтардан бастап ҚР Салық кодексіне сәйкес шипажайлық-курорттық сауықтыруға арналған жолдамалар мен материалдық көмек салық салуға жатады. Осыған байланысты компания басшылығы маңызды шешім қабылдады, енді қызметкерлерден жолдамалар үшін ұсталатын пайыз толығымен жойылды. Ал бұрын кластық нөміріне байланысты жолдама құнынан 5%-дан 30%-ға дейін ұсталатын.
Сондай-ақ Сәкен Сейфуллин атындағы ведомстволық санаторий-профилакторийге жолдама бағасы төмендетілді, бұл қызметкерге өз жолдамасын бос орындар болған жағдайда жыл бойы отбасы мүшелеріне беруге немесе бірге пайдалануға мүмкіндік береді, ал бұрын жолдаманы отбасы мүшелеріне тек 1 және 4-тоқсанда ғана беруге рұқсат етілген болатын. Санаторлық-курорттық емделуге жолдамалар жалақысы 180 АЕКтен аспайтын қызметкерлерге беріледі.
Бұл ретте теміржолшылардың әрдайым таңдауы болады. Белгіленген лимит шеңберінде олар компания мақұлдаған кез келген басқа сауықтыру орнына өз бетінше демалыс орнын таңдай алады. Екінші жағдайда қызметкерге 60 АЕК-ке дейінгі мөлшерде материалдық көмек төленеді.
2026 жылы компания Щучинск – Бурабай курорттық аймағындағы Сәкен Сейфуллин шипажайымен, Қостанай облысындағы «Сосновый бор», Қарағанды өңіріндегі «Арман», «Балқаш» , Түркістан облысындағы «Katiya Grand plasa», «Ақсу Деми», «Ақ Тілек», Жамбылдағы «Айша бибі», «Самал», Алматы және Алматы облысындағы «Ақ-Қайың» және «BAQSY», Павлодардағы «Мойылды», Қызылорда облысындағы «Жаңақорған», «Орда Сығанақ» және Жетісу өлкесіндегі «Жаркент Арасан» сауықтыру орындарымен келісімшарт жасасқан.