Жеті сағаттық «толаскез» жалғасуда
Бүгінгі таңда жолдың жөнделетін 14 шақырымы қалды. Бастапқыда толаскез кестесін үзіп-үзіп жариялай отырып құрған жол салушылар енді күннің күрт суытып, жердің қатуына байланысты осы аптада қатарынан 7 тәуліктік «толаскез» бекітті.
Қыркүйекте басталған жөндеу жұмыстарын «Теміржол жөндеу» ЖШС-не қарасты «Астана» ПМС мекемесі жасауда. Жұмыс басында Астана жол дистанциясының директоры Ертас Сыздықов пен оның жолды күтіп ұстау бойынша орынбасары Бағдат Ерсұлтанов бастаған жолшылар 1996 жылдан бері жатқан ағаш шпалдарды темірбетон түріне ауыстырған мердігер мекеме жұмысшыларының жол жөндеу жұмыстарын қадағалап, қабылдап алуда. Таңертең сегізден кешкі сегізге дейін тыным таппай жұмыс істеп жатқан мердігерлер жұмысына дистанция басшылығы оң баға берді. Соңғы 7 тәуліктік толаскез барысында олар жоспардағы телімнің қалған барлық шақырымдарын жөндеу жұмыстары аяқталады деп отыр.
– Міне, көріп тұрғаныңыздай, жол ескірген, мердігерлер жаңа темірбетон шпал, бекітпелер және қиыршық тас пайдаланып, жолды жаңартуда. Біздің дистанция бойынша 2018 жылға 54 км жолды күрделі жөндеуден өткізу көзделген еді. Бұған дейін соның 13 км жолын осы мердігер мекеме Шортанды-Ақкөл аралығында жасап шықты. Енді қалған қырық шақырым осы Қырқыншы-Сарыоба телімінде жүріп жатыр. Бұдан бөлек, дистанцияның өз жолшыларының күшімен 4 км жерге орташа жөндеу жүргіздік. Орташа жөндеу Астана, Жасыл және Шортанды станциялары бойынша жасалды. Қарамағымызда мыңнан астам адам қызмет етсе, соның 525-і – жолшылар. Қазіргі таңда мекемеміз қысқы маусымға дайындық жұмыстарын пысықтап отыр, – дейді Астана жол дистанциясының директоры Ертас Сыздықов.
Бұл Ақмола магистральдық желі бөлімшесі бойынша жүргізіліп жатқан үшінші күрделі жөндеу, біріншісі Атбасар телімінде 38 км жерге, екіншісі Ақкөл-Шортанды телімінде 13 км жолға жасалған. Күрделі жөндеу жүргізіп жатқан мердігер мекеменің аға жол шебері Айдар Қожамқұлов «Теміржол жөндеу» ЖШС бойынша биылға 112 км жолға күрделі жөндеу жүргізу міндеттелгенін атап өтті. Бүгінде соның 85 шақырымы бойынша жұмыс біткен.
– Мен негізінен жолды төсеу жұмыстарымен айналысамын. Ескі жолды бұзатын жолшылар бөлек. Бұған дейін осы солтүстік өңірмен қоса Тараз-Шымкент жақта да жөндеу жүргіздік. Осы Қырқыншы-Сарыоба телімі – біздің биылғы соңғы жұмысымыз. Біз үшін ауа-райының қолайсыздығы деген болмайды. Ештеңеге қарамай жұмыс жүргіземіз. Қазіргі таңда көптеген техникамыз және 5 вагонымыз бар, оның бірі – асхана, қалғандары – жолшыларға, механизаторларға, командирлік вагондар. Бір телімнің күрделі жөндеуіне 120 адам жұмылдырылады. Техникаларымызға келсек, 2 кран, 4 МПД моторка деген техника бар, ол рельс-шпалды торкөздерін тартады, топырақ пен қиыршық тас төккен соң соның артынан баластер деген техника жүреді, ол жолды көтергенде қиыршық тас астына түседі. Одан әрі ВПО 3000 техникасы жерді нығыздайды. Содан бөлек 4 трактор, 1 автогрейдеріміз бар, – деген Айдар Қожамқұлов жаңа жол төселгеннен кейін пойыздардың қозғалыс жылдамдығы сағатына 100-140 километрге дейін артатынын атап өтті.
Райхан РАХМЕТОВА
Суретті түсірген Александр ЖАБЧУК