Үздіктер еңбегі еленді
Қызылорда белгі беру және байланыс дистанциясы ұжымы күзгі комиссиялық тексерудің нәтижесін қорытындылап, үздік теміржолшыларды марапаттады.
Жалпы дистанция ұжымы Анакөл бекеті мен Шорнақ станциялары арасындағы төрт жүз шақырымнан асатын теміржол учаскесінде жылжымалы құрамдардың қозғалыс қауіпсіздігін сақтауға қызмет етуде. Комиссиялық тексеру кезінде СОБ құрылғылары, радиобайланыс тетіктері, релелік будкалар, ВОЛС, КТСМ-02 контейнерлері мен ЭЦ қосынының ғимараттары, байланыс құрылғыларының қатал маусымда жұмыс жасауы ерекше бақылауға алынып, нәтижесінде 295 кемшілік анықталған. Десе де, дистанция қызметкерлерінің әбжіл іс-қимылдары арқасында кейбір олқылықтардың орны дереу толтырылса, ал қайсыбірін түзетуге уақыт белгіленіп, акт жасалған. Тағы бір атап өтерлігі, күзгі тексерісті жүргізуші комиссия назарынан дистанция мамандарының кәсіби міндеттерін мінсіз атқаруы да таса қалмай, осы бағытта бірнеше сатылы бақылау өткізілген. Сонымен қатар дистанция тарапынан көмек-қолдауға ие Шорнақ станциясындағы СОБ, ЭЦ қосыны мен көптеген байланыс құрылғылары да комиссия қарауынан өтті. Ақмая мен Шорнақ бекеті дистанцияның шефтік көмек көрсетілетін нысаны саналады. Сондықтан осындағы теміржолшылардың жұмысын ұйымдастырып, басшылық етіп әрі бекеттердегі байланыс құрылғыларының үнемі бабында болып, мінсіз қызмет көрсетуіне жауапты аға электромеханик Анарбай Юсубаевтың да марапатталушылар қатарынан табылуы заңдылық еді.
– Жылына екі мәрте, яғни күз және көктемде өткізілетін комиссиялық тексеру – пойыздардың қауіпсіз қозғалысын сақтау шараларын арттыру, маусымдық жұмыстарға еңбек ұжымдарының, шаруашылықтың дайындығын пысықтау және кем-кетікті уақытылы түзетуге бағытталған емтихан іспеттес. Биылғы жылы біздің ұжым күзгі комиссиялық тексеруді ұйымшылдықпен өткізіп, анықталған кемшіліктерді дер уақытында жойды, әрі жылжымалы құрамдардың телімдерден кедергісіз әрі қауіпсіз өткізілуіне қажетті жағдайды жасады. Адал еңбек өтеусіз қала ма? Жоқ, әрине. Өндірістік жұмысты жоғары деңгейде ұйымдастыра білген теміржолшылар еңбегі еленіп, Қызылорда магистральдық желі бөлімшесінің директоры Ибраким Басықараевтың №219 бұйрығы негізінде дистанция басшылығы мен кәсіподақ ұйымы атынан марапатқа ие болды, – дейді дистанцияның кәсіподақ ұйымының төрайымы Марияш Шайкемелова.
Күзгі комиссиялық тексеру барысында өз учаскелеріндегі өндірістік ғимараттарды таза, санитарлық нормаға сай әзірлеп, байланыс құрылғыларының бабында жұмыс жасауына көп еңбек сіңірген дистанция теміржолшылары арасынан Шиелі-Түркістан учаскесінің аға электромеханигі Қалмахан Увашев, Сауран станциясынан КТСМ-02 құрылғысын қыс маусымына кәсіби тұрғыда дайындай білген КТСМ электромеханигі Асылбек Бұхарбаев, шефтік нысан Ақмая бекетінен ДСП ғимараты мен СОБ құрылғыларын әзірлеген Әбілхан Майгелдиев пен өндірістік ғимараттар мен автогаражды, дрезина боксын қыс маусымына сақадай сай дайындаған автомотриса машинисі Өркен Маханов дистанция басшысымен кәсіподақ ұйымының атынан мақтау қағазын иеленді.
Сабырхан СЕЙІЛБЕКҰЛЫ, Қызылорда
Суретті түсірген автор