"Тежегіш табан - қауіпсіздік шегі": Алтынкөлде кезекті тренинг өтті
Алтынкөл станциясында шекараға жақын станциялар теміржолшыларының білімі мен тапқырлығын тексерген «Тешегіш табан – қауіпсіздік шегі» тақырыбындағы жарыстық тренинг қызықты өтті, деп хабарлайды "Қазақстан теміржолшысы" газетінің тілшісі.
Тренингке Алтынкөл стнциясының, «Кедентранссервис» АҚ кірме жолы мен құрғақ порты кірме жолдарының, Алтынкөл станциясының айналымдық локомотив депосының және «Евротранзит – КТС» ЖШС қызметкерлерінен құралған бес топ қатысты.
Алтынкөл станциясының бастығы Жандос Ұнтақбаев жарысқа қатысушыларға сәттілік тілей отырып, жалпы компанияның сапалы жұмысы әр қызметкердің өз ісіне адалдығы мен жауапкершілігіне байланысты екенін және де олар жұмыс өндірісі барысында өз өмірлеріне де жауапты екенін атап өтті.
Оның айтуынша, қозғалыс құрамдарының бүлінуі мен соқтығысуына әкелетін бұзушылықтар көбінесе станция жолдарында құрамдарды тежегіш табандарымен дұрыс бекітпеу салдарынан болады екен. Осыған орай, 22-31 қазан аралығында «Тешегіш табан» онкүндігі жарияланыпты. Бұл онкүндік мақсаты станция жұмыскерлеріне ереже бұзушылықтардың қайталануына жол бермеу әрі тежегіш табандарын қолдану, сақтау және есепке алу тәртібін түсіндіру екен.
Тренинг шеңберінде 3 бөлімнен тұратын викторина сайысы болды. Бірінші «Сұрақ-жауап» бөлімінде барлық командалар жақсы көрсеткіштер көрсетті десе болады, екінші бөлім «Тешегіш табанының ақаулығын тап» деп аталды. Бұл жерде қатысушылар сурет бойынша тежегіш табанның ақаулығын табуы керек еді. Бұл тапсырманы Алтынкөл станциясы мен «Кедентранссервис» АҚ командаларының қатысушылары жақсы орындап шықты. Үшінші бөлім «Тежегіш табанның техникалық және пайдалану сипаттамасын ата» деп аталды. Бұл тапсырманы барлық команда шапшаң әрекет етіп, кәсіби білім деңгейін көрсетіп орындап шықты.
Станция бас инженері Мақсат Мамбетқұлов жарыс соңында қызметкерлердің өз білімдерін дәлелдейтін әрі біліктіліктерін арттыратын осындай тренингтер мен ойын түрінде өтетін сайыстардың теміржолдағы қауіпсіздік мәселелеріне көңіл аудартудың ұтымды жолы екенін атап өтті. «Өндірістегі қауіпсіздік мәдениетін көтеру – маңызды мәселе, бүгінгідей жарыстар теміржолшыларға жақсы көңіл-күймен қатар, білімдерін күшейтуге жақсы көмектеседі. Әрі командамен жұмыс істеуге үйретеді, – дейді Мақсат Мамбеткулов.
Елена ҚОЛДАСБАЕВА, Алтынкөл
Суретті түсірген автор