Маңғыстауда зейнеткерлер арасында үстел теннисінен жарыс өтті
Ептілік пен шапшаңдыққа құрылған ойын өте тартысты өтті. Бүгінде көп жылғы еңбектерінің зейнетін көріп отырған теміржол ардагерлері жарыста бақ сынап қана қоймай, бұрынғы жұмыс жылдарын еске түсіріп, мәре-сәре болды.
"Теміржол зейнеткерлері арасында спорттық жарыс өткізу дәстүрге айналған. Бұл шараны аға-апаларымыз асыға күтеді десе де болады. Жылда спорттық ойындарға шақырсаң, қалмай, үнемі қатысып жүретін белсенді ардагерлеріміз де бар. Олар өзгелерге де үлгі. Жалпы, биылғы ойын да тартысты өтті. Нәтижесінде бірінші орынды Болған Досжанова, екінші орынды Жаңабай Тұрашов, үшінші орынды Сергей Тулиев алды. Жеңімпаздарға құнды сыйлық, кубок, дипломдар табысталды", – деген Маңғыстау теміржолының спорт нұсқаушысы Нұрайна Қыдырова, қазір жұмыс көрігін қыздырып жатқан теміржолшылар арасында да үстел теннисінен іріктеу ойындары өтіп, бірінші, екінші орын алған Марат Ағатай, Ернар Айдарханов, Салтанат Иманғалиева келер жылы сәуір айындағы республикалық чемпионатқа жолдама алғанын айтты.
Шахизат САРИНА