Семейліктер Арыс балаларын қарсы алды
Абай облысы бойынша меншікті тілші
Ел шығысына оңтүстіктегі апат орын алған Арыс қаласынан 150-ге жуық балақай келді. Демалыс күні Семей қаласындағы теміржол вокзалында балаларды қарсы алу салтанаты болып өтті.
Семей магистральдық желі бөлімшесінің бас инженері Айдос Жаманбаев бастаған жергілікті теміржолшылар Алматы-Қызылорда пойызынан түскен балғындарды зор сәнсалтанатпен күтіп алды. Құттықтау сөз айтылып, ән мен жырдан шашу шашылған соң балақайлар Семей вокзалының жанында өздерін күтіп тұрған, теміржолшылардың көмегімен әзірленген арнайы көліктерге отырып, жазғы сауықтыру лагерьлеріне жол тартты.
– Шығыс теміржолшылары Арыспен бірге! Апат орын алған оңтүстіктегі қалаға семейлік сала қызметкерлері де қолдан келген көмектерін жасап жатыр. Бір күндік жалақы аударумен қатар, «Nur Otan» партиясы филиалы арқылы арнайы азықтүлік тиелген контейнер де жөнелттік, міне, енді балаларды алдырып, табиғат аясында демалдырып қайтармақпыз, бұл олардың бастан кешкен қорқынышты оқиғаны ұмытуына сеп болып, сергітер деп ойлаймыз, – дейді балғындарды күтіп алуға келген Жаңа-Семей жол дистанциясының кәсіподақ ұйымының төрайымы Зульфия Мәжитқызы.
Пойыздан жаңа түскен балғындарды сөзге тартқанымызда олар сол бір апат орын алған қорқынышты күнді әлі де көздеріне жас ала отырып айтып берді. Лагерьде олармен психолог мамандар жұмыс істеп, түрлі көңілді ойындар өткізуі жоспарланған екен. Балақайлардың жаз қызығын көңілді өткізулеріне біз де тілектестік білдірдік.