Қызылордалық теміржолшылар балаларға демалыс сыйлады
Қызылорда облысы бойынша меншікті тілші
Отбасындағы бүлдіршіндердің жазғы демалысын тиімді жоспарлайтын қызылордалық теміржолшылар биыл да жылдағы қалыптасқан дәстүрмен балаларға көңілді демалыс сыйлауды жалғастырды.
Биылғы маусымда Қызылорда магистральдық желі бөлімшесі бойынша 180 бүлдіршін еліміздің көрікті сауықтыру лагерьлерінде демалуда. Олардың алғашқы легі демалып та келді.
– Қазіргі таңда 100 бала «Машат» сауықтыру лагерінде демалып жатса, алғашқы лекпен 50 бала Алматыдағы «Әл-таир» лагерінде демалып келді. Енді тамыздың алғашқы онкүндігінде тағы бірлек Алматыға аттанады. Балаларды іріктеу олардың отбасының әлеуметтік деңгейіне қатысты таңдау жасалады. Бірінші кезекте көпбалалы, жалғызбасты, денсаулығына байланысты арнаулы көмек алатын, әлеуметтік әлсіз отбасының балаларына таңдау жасалады, жолдаманың 10 пайызын баланың ата-анасы төлесе, қалған шығындар Ұлттық компания тарапынан өтеледі, – дейді бөлімшенің кадр бөлімі басшысы Айдана Нұрмашқызы.
Балалардың сауықтыру лагерьлеріне барып-қайту кезінде бөлімшенің кәсіподақ ұйымы мүшелері, арнайы медицина қызметкері жетекшілік жасайды. Олардың қауіпсіздігі, ас-суының тазалығы, орналасқан орындарының санитарлық нормаларға сай болуы бақылауда болады.
– Балалар лагерінен бөлек Ұлттық компания тарапынан ұйымдастырылған «Туған елге саяхат» пойызымен саяхаттауға биыл Қызылорда ЖТ және магистральдық желі бөлімшелерінен екі-екіден бала таңдалып жіберілді, – дейді кадр бөлімі басшысы.